Ապահովագրություն և հակակարկտային ցանցեր. նախարարի լուծումը

Կառավարության նիստից հետո գյուղատնտեսության նախարար Իգնատի Առաքելյանը լրագրողների հետ ճեպազրույցում անդրադարձավ կարկտահարության վնասներին ու գյուղատնտեսության հիմնական խնդիրներին: Նրա խոսքով` ունեն երեք օր ժամանակ` ուսումնասիրելու կարկտահարության վնասները և ներկայացնելու առաջարկություններ, դա կարող է նախատեսել նաև հարկերի, տուրքերի զրոյացում կամ հետաձգում:

«Բայց այս  ամենը հարցի լուծում չէ, քանի որ չենք կարող փոխհատուցել ամբողջ վնասը, որը կրել են գյուղացիները: Ամբողջ վնասի փոխհատուցումը կարող է իրականանալ միայն ապահովագրական համակարգի միջոցով: Հակակարկտային ցանցերը նույնպես կարող են լավ գործիք լինել»,- ասաց նախարարը:

Դիտարկմանը, որ գյուղատնտեսության ապահովագրությունը թանկ երևույթ է, որը հնարավոր է զարգացած տնտեսության պարագայում, նախարարը նշեց, որ դա ճիշտ է, սակայն կառավարության պիլոտային ծրագիրը պետք է սկսեն իրականացնել` 2018-ից սկսած, որը ներառելու է  ապահովագրությունը,  ցանցերի ներդրումը, և հույս կա, որ 2-3 տարում գյուղատնտեսությունը կհասնի այն պահանջարկին, որը կձևավորի շուկան: Նախարարի  հաշվարկով` 2-3 տարի ժամանակ կպահանջվի` ապահովագրական համակարգը և հակակարկտային ցանցերը ներդնելու համար: