Պետք է զինծառայողների համար պետական ապահովագրություն մտցնել. Բագրատյան

Այսօր ԱԺ արտահերթ նիստում քննարկվում է ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին օրենքի նախագիծը երկրորդ ընթերցմամբ ընդունելու հարցը: Ըստ օրինագծի` յուրաքանչյուր աշխատող քաղաքացի պետք է ամսական 1000 դրամ փոխանցի հիմնադրամին:

Ելույթ ունեցավ ՀԱԿ խմբակցության պատգամավոր Հրանտ Բագրատյանը` միանգամից նշելով, որ դեմ է նախագծին, թեև քվեարկությանը չի մասնակցելու, սակայն իր «ոչ»-ը ցանկանում է ներկայացնել ելույթով: Ըստ պատգամավորի` դա սխալ օրենք է, որը վկայում է այդ ոլորտում իշխանության սխալ քաղաքականության մասին:

«Շատ կներեք, ո'չ Սահմանադրության, ո'չ հարկային օրենսգրքում մենք չենք գրել ազգային տուրքի մասին որևէ բառ: Սա ազգային տուրք չէ, սա սովորական սոցիալական ծախս է»,- ասաց Բագրատյանը:

Նա նշեց, որ առաջարկ էր ներկայացրել զինվորների աշխատավարձը բարձրացնելու մասին, ցույց տվել անգամ դրա տեղը, բայց այն մերժվեց: Պատգամավորը խորհուրդ տվեց Վիգեն Սարգսյանին` մտածել նաև ողջ զինվորների մասին և վերջ տալ ամբոխավարությանը:

«Ես առաջարկել էի դնել եկամտահարկի լողացող սանդղակ: Ձեզ ո՞վ ա ասել, որ պիտի արհամարհեք իմ առաջարկը: Դո՞ւք ինձ պետք է սովորեցնեք միասնականության գաղափարը: Դուք դրա իրավունքը չունեք: Պետք է մտցնել պետական ապահովագրություն զինծառայողների համար: Այդ ժամանակ շատ հարցեր կլուծվեն»,- ասաց Բագրատյանը:

Նա հորդորեց նախարարին` ուշադրություն դարձնել, որ ամբողջ բանկային համակարգը վտանգի տակ է: