Կաշառք ստանալու պահին ձերբակալված դատավորի ինքնազգացողությունը վատացել է

Շենգավիթ վարչական շրջանի ընդհանուր իրավասության դատարանում այսօր պետք է կայանար կաշառք ստանալու պահին ձերբակալված դատավորի վերաբերյալ քրեական գործով հերթական դատական նիստը, սակայն դատավոր Իշխան Բարսեղյանի ինքնազգացողությւոնը կտրուկ վատացել է, նրա համար շտապօգնություն են հրավիրել: Նշենք, որ նա արյան ճնշման հետ կապված խնդիրներ ունի:

Հիշեցնենք, որ Իշխան Բարսեղյանը ձերբակալվել է հոկտեմբերի 27-ին Արշակունյաց պողոտայի և Գարեգին Նժդեհի փողոցի խաչմերուկի գետնանցումում քաղաքացի Նորիկ Հակոբյանից կաշառք ստանալու պահին՝ ՀՀ ԿԱ ԱԱԾ կողմից իրականացված օպերատիվ-հետախուզական միջոցառման շրջանակներում:

Համաձայն մեղադրական եզրակացության՝ Իշխան Բարսեղյանը, 1999 թվականից զբաղեցնելով Երևան քաղաքի Շենգավիթ վարչական շրջանի ընդհանուր իրավասության դատարանի դատավորի պաշտոնը, հանդիսանալով դատական իշխանության մարմնի ղեկավար աշխատող և մշտապես իշխանության ներկայացուցչի գործառույթներ իրականացնող պաշտոնատար անձ, Նորիկ Հակոբյանի օգտին իր լիազորությունների շրջանակում գործողություններ կատարելու համար նրանից միջնորդի միջոցով պահանջել և անձամբ ստացել է խոշոր չափերով կաշառք: