կարևոր
3103 դիտում, 9 ամիս առաջ - 2023-05-15 21:23
Քաղաքական

Խաչատուրովի գործով կալանքի տակ գտնվող անձանցից մեկի ինքնազգացողությունը վատացել է. դատարանը շարունակում է նիստը

Խաչատուրովի գործով կալանքի տակ գտնվող անձանցից մեկի ինքնազգացողությունը վատացել է. դատարանը շարունակում է նիստը

Երրորդ բանակային կորպուսի նախկին հրամանատար, գեներալ Գրիգորի Խաչատուրովի եւ եւս 12 անձի գործով ընթացող դատական նիստին կալանքի տակ գտնվող անձանցից մեկի ինքնազգացողությունը վատացել է: Դատարան է ժամանել շտապօգնության մեքենա:

Լրագրողների հետ զրույցում փաստաբան Միհրան Պողոսյանն ասաց, որ մեղադրյալի բացակայությամբ դատարանը շարունակում է դատական նիստը. «Դատարանը շարունակում է իր անօրինական գործողություններն իրականացնել: Այսինքն՝ իր համար միեւնույն է՝ մեղադրյալը կա՞, թե՞ ոչ, դատավարության մասնակիցներն ամբողջակա՞ն են, թե՞ ոչ: Ինքը ունի հրահանգ եւ ուղիղ գնում է այդ նշանակետին: Դատավարության մասնակիցներին ապօրինի պահում են նիստերի դահլիճում: Այսինքն՝ աշխատանքային ժամը վաղուց ավարտվել է»:

Հիշեցնենք, որ վարույթի շրջանակում մեղադրանք է ներկայացվել ՀՀ պաշտպանության նախկին նախարար Սեյրան Օհանյանին` ՀՀ քրեական օրենսգրքի 179-րդ հոդվածի 3-րդ մասի 1-ին կետով եւ 3 դրվագ 308-րդ հոդվածի 2-րդ մասով (առանձնապես խոշոր չափերով գույքի վատնում եւ պաշտոնեական լիազորությունների չարաշահում, որն անզգուշությամբ առաջացրել է ծանր հետեւանքներ)

Կառավարությանն առընթեր անշարժ գույքի կադաստրի պետական կոմիտեի նախկին նախագահ Մանուկ Վարդանյանին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով (պաշտոնեական լիազորությունների չարաշահում, որն անզգուշությամբ առաջացրել է ծանր հետեւանքներ),իսկ ՀՀ պաշտպանության նախարարության N զորամասի նախկին հրամանատար Գրիգորի Խաչատուրովին` ՀՀ քրեական օրենսգրքի 190-րդ հոդվածի 3-րդ մասի 1-ին եւ 3-րդ կետերով (փողերի լվացում, որը կատարվել է առանձնապես խոշոր չափերով եւ պաշտոնեական դիրքն օգտագործելով)։

Մեղադրանք է ներկայացվել նաեւ «Մոսթոն Ինժիներինգ» ընկերության տնօրեն Դավիթ Գալստյանին՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով եւ 325-րդ հոդվածի 1-ին մասով (առանձնապես խոշոր չափերով խարդախություն եւ փաստաթղթի կեղծում) եւ եւս 9 անձի: