Չի կարելի. Գագիկ Հարությունյանը երկրորդ անգամ դիտողություն արեց Լևոն Զուրաբյանին

ՍԴ-ում մեկնարկեց Կոնգրես-ՀԺԿ կուսակցությունների դաշինքի դիմումի հիման վրա` ՀՀ կենտրոնական ընտրական հանձնաժողովի 2017 թվականի ապրիլի 9-ի «Հայաստանի Հանրապետության Ազգային ժողովի 2017 թվականի ապրիլի 2-ի ընտրությունների արդյունքներն ամփոփելու մասին» թիվ 163-Ա որոշումը վիճարկելու վերաբերյալ գործի քննությունը:

Ելույթ ունեցավ Կոնգրես-ՀԺԿ դաշինքի անդամ Լևոն Զուրաբյանը: Նա հիմնականում քաղաքական ելույթ ունեցավ, որում մեղադրում էր ՀՀԿ-ին ու ԿԸՀ-ին ընտրությունները կեղծելու, ֆինանսական ու վարչական լծակներով քարոզարշավ տանելու մեջ:

Ելույթի սկզբում ՍԴ նախագահ Գագիկ Հարությունյանը ընդհատեց նրան` ասելով, որ պետք է ոչ թե քաղաքական ելույթ ունենա, այլ փորձի փաստարկներ բերել դիմումի վերաբերյալ և խոսի դիմումում ներկայացվող հարցի շրջանակներում:

Ելույթի վերջում ՍԴ-ն ստիպված էր երկրորդ անգամ ընդհատել Լևոն Զուրաբյանին և դիտողություն անել այն պահին, երբ Լևոն Զուրաբյանը, դիմելով ԿԸՀ ներկայացուցիչներ Տիգրան Մուկուչյանին ու Արմեն Սմբատյանին, նրանց անվանեց հանցագործներ:

«Դուք Սահմանադրական դատարանում մարդկանց  հանցագործներ եք անվանում: Չի կարելի»,- ասաց Գագիկ Հարությունյանը: