ԵՄ-ն չի ցանկանում ձեր ներքին քաղաքական բանավեճի գործիքը դառնալ. ԵՄ դեսպանը՝ Լևոն Զուրաբյանին

Այսօր ԱԺ եվրաինտեգրման հարցերի հանձնաժողովը լսումներ էր կազմակերպել` «Արեւելյան գործընկերության Ռիգայի գագաթաժողովին ընդառաջ» թեմայով:

Նշենք, որ լսումներն ընթացան որոշ տեսակետների բախման մթնոլորտում: Մասնավորապես` ՀԱԿ ղեկավար Լևոն Զուրաբյանը պնդում էր, թե ԵՄ զեկույցը Հայաստանի մասին չի արտացոլում իրականությունը, քանի որ մարդու իրավունքների ու ժողովրդավարության ոլորտում Հայաստանը հետընթաց է ապրում:

Բոլոր առարկություններին ու հարցերին անդրադարձավ ԵՄ-ում Հայաստանի դեսպան Տրայան Հրիսթեան` ասելով, որ ԵՄ զեկույցը Հայաստանի մասին նպատակ չունի ներկայացնել Հայաստանի սոցիալ-քաղաքական զարգացումների պատկերը, այլ ներկայացնում է այն, թե ինչպես է ԵՄ-ն իրականացնում իր գործողությունների ծրագիրը Հայաստանում: «Առաջընթացը, որը տեղի է ունեցել Հայաստանում, չի նշանակում, որ ԵՄ-ն պետք է դրա հիման վրա ընդհանուր քաղաքական կամ տնտեսական վերլուծություն անի»,- ասաց նա:

Զուրաբյանին անդրադառնալով` Տրայան Հրիսթեան ասաց. «Մենք չենք ցանկանում ձեր ներքին քաղաքական բանավեճի գործիք դառնալ: ԵՄ-ն Հայաստանում է՝ աջակցելու այն ծրագրերին, որոնք համապատասխանում են եվրոպական չափանիշներին»:

Դեսպանը հավելեց, որ ԵՄ-ն երբեք չի վիճարկել Հայաստանի անդամակցությունը ԵՏՄ-ին, և սեպտեմբերի 3-ին ԵՄ-ն հայտարարեց, որ հարգում է Հայաստանի ինքնիշխան ընտրությունը և կհամագործակցի Հայաստանի հետ ապագայում էլ: Նրա խոսքով՝ Ռիգայի գագաթաժողովը նշանաձող է, որը ցույց կտա, թե որ երկիրը որտեղ է գտնվում, և ինչպես կարող են հետայսու աշխատել, նաև` թե ԵՄ-ն ուր է ուղղելու իր աջակցությունը, դիվանագիտական ջանքերը:

«Մեծ առաջընթաց ունենք Վիլնյուսից Ռիգա ընկած ժամակահատվածում, որով Հայաստանի ու ԵՄ-ի դիրքորոշումներն ավելի ու ավելի են մոտենում իրար: Ռիգայից նոր պայմանագրային հարաբերություններ ենք սպասում, չէի վախենա ասել, որ երկար կտևեն բանակցությունները»,- ասաց Տրայան Հրիսթեան:

Դեսպանը խոսեց նաև Հայաստանին տրվող բյուջետային դրամաշնորհների մասին` ասելով, որ ԵՄ-ն այս հարցում ապավինում է ԱԺ-ին, որովհետև ԱԺ-ն ու ՎՊ-ն պետք է հսկեն, թե ինչպես են օգտագործվում ԵՄ-ի կողմից ստացվող գումարները:

«Ձեր ընտրողները, որոնք ձեզ խորհրդարան են ուղարկել, պետք է իմանան, թե ինչ է իրենից ներկայացնում ԵՄ-ն, ինչ օգուտներ կարող է տալ ԵՄ հետ համագործակցությունը»,- շեշտեց ԵՄ դեսպանը: