Բիզնես-պետություն համագործակցության լավ օրինակ

ՀՀ կրթության և գիտության նախարարությունը` ի դեմս նախարար Լևոն Մկրտչյանի, և Microsoft ընկերությունը` ի դեմս ԱՊՀ-ում Microsoft-ի տարածաշրջանային գրասենյակի ղեկավար Ռոնալդ Բինկոֆսկու, այսօր ստորագրել են փոխըմբռնման հուշագիր: Նախարար Լևոն Մկրտչյանը շնորհակալություն է հայտնել Microsoft ընկերությանը` տարիներ շարունակ կրթական համակարգին ցուցաբերած մեծ աջակցության համար:

«Աշխարհը զարգանում է պատասխանտու, մեծ ընկերությունների ջանքերի շնորհիվ, որոնք հասկանում են, որ բացի բիզնեսից, ունեն նաև սոցիալական պատասխանատվության և դրա շրջագծում պարտավոր են միջավայր փոխել: Microsoft ընկերությունն այն կազմակերպություններից է, որը, օրինակ, Հայաստանում ավելի քան մեկ տասնամյակ շարունակում է հետևողականորեն փոխել մեր կրթական միջավայրը՝ առաջարկելով նոր տեխնոլոգիական լուծումներ, համագործակցության նոր ձևաչափեր: Այս համատեքստում ցանկանում եմ հատուկ շնորհակալություն հայտնել Microsoft ընկերության հայաստանյան թիմին` հետևողական աջակցության և նոր նախաձեռնությունների համար: Սա բիզնես-պետություն համագործակցության լավ օրինակ կարող է լինել»,- նշել է նախարարը` ընդգծելով, որ ստորագրված հուշագրով շարունակվում է Microsoft-ի հետ համագործակցությունը: «Այս հուշագրով կարևոր խնդիր ենք լուծում` նախ` Microsoft ընկերությունը բավականին արտոնյալ պայմաններով միշտ տրամադրում է հատուկ ծրագրեր, որոնք բավական թանկ են և մեծ օգնություն են մեր ուսհատատություններին: Երկրորդը կրթության մատչելիության խնդիրն է. էլեկտրոնային կրթության տարրերը հնարավորինս մատչելի դարձնելու հույսեր ունենք, և այս հուշագիրը նման հնարավորություն է ընձեռում: Ներկայումս գյուղական դպրոցների հետ տեսադասեր անցկացնելու ծրագիր ենք իրականացնում, և այս խնդրում կարևոր է տեխնիկական լուծումների ձևաչափ գտնել նաև Microsoft ընկերության օգնությամբ»,-ընդգծել է նախարարը:

ԱՊՀ-ում Microsoft-ի տարածաշրջանային գրասենյակի ղեկավար Ռոնալդ Բինկոֆսկին նշել է, որ տարիներ շարունակ Microsoft-ն աջակցությունն է հայտնել Հայաստանի կրթական համակարգին` ոչ միայն ներմուծելով նոր տեխնոլոգիաներ, այլ սովորեցնելով` ինչպես դրանք կիրառել: «Աշխարհի տարբեր երկրներում գործող Microsof-ի ընկերություններում իմ 25 տարվա փորձառությունը, ինչպես նաև մի շարք գաղափարներ պատրաստ եմ փոխանցել Հայաստանի կրթական ոլորտին՝  նպաստելով այդ համակարգի բարելավմանը և առաջխաղացմանը»,-նշել է Ռոնալդ Բինկոֆսկին` վերոնշյալ համագործակցությունից ակնկակելով նորանոր ձեռքբերումներ:

Microsoft ընկերության հայաստանյան գրասենյակի տնօրեն Լիանա Կորկոտյանը իր հերթին նշել է, որ ընկերության համար չափազանց կարևոր է աջակցություն ցուցաբերել կրթության ոլորտին: «Արդեն մի քանի տարի սերտորեն համագործակցում  ենք ԿԳ նախարարության հետ և անում ենք հնարավորը, որ ժամանակակից տեխնոլոգիաները, որոնք կիրառվում են այլ երկրների կրթական միջավայրում, բերենք Հայաստան և հասանելի դարձնենք մեր երեխաներին և ուսուցիչներին»,-ընդգծել է նա:

Նշենք, որ համաձայն ստորագրված հուշագրի` ՀՀ կրթության և գիտության նախարարությունը համագործակցության շրջանակում պարտավորվում է` աշխատանքային խմբերում մասնակցության միջոցով ռազմավարության մշակում և իրականացում, ծրագրի գնահատում և  ծրագրի իրականացմանն ուղղված հնարավոր նվիրաբերվող ռեսուրսների որոշակիացում, ազգային ծրագրերի աջակցում, որոնք միտված են ՏՀՏ-ի ներդրմանը կրթության ոլորտում։

Microsoft ընկերությունը պարտավորվում է` նորարարական կրթական նախաձեռնությունների ռազմավարության մշակման և իրականացման աջակցություն, ծրագրի գնահատում և Microsoft-ի կողմից ծրագրի իրականացմանն ուղղված հնարավոր նվիրաբերվող ռեսուրսների որոշակիացում, ազգային ծրագրերի աջակցում, որոնք միտված են ՏՀՏ-ի ներդրմանը կրթության ոլորտում։

Հուշագրի շրջանակներում Microsoft ընկերությունն ուսումնական գործընթացում կներդնի ծրագրային արտադրանքներ, հետաքրքիր նախաձեռնությունների միջոցով կխրախուսի ուսուցիչների և աշակերտների ինքնակրթության ձգտումը և մասնակցությունը սեմինարներին, վերապատրաստումներին, կլոր-սեղան քննարկումներին, կոնֆերանսներին և տարբեր ուսումնական հաստատությունների ուսուցիչների միջև փորձի փոխանակման ծրագրերին։

ՀՀ ԿԳՆ