Բարձրացնելու ենք Երևան քաղաքի արդյունավետ կառավարման հարցը. Դավիթ Խաժակյան

Քաղաքը փոփոխությունների կարիք ունի. լրագրողների հետ հանդիպման ժամանակ նշեց «Ելք» դաշինքից ավագանու թեկնածու Ալեն Սիմոնյանը:

Ըստ նրա` մեծ խնդիրներ կան բոլոր ոլորտներում` սկսած տրանսպորտից, ճանապարհներից, ինչպես նաև` բազմաթիվ տեսախցիկներ, արագաչափեր, կարմիր գծեր, որոնք քաղաքացիների համար մեծ բեռ են:

«Բացի տնտեսական բաղադրիչից, կա նաև քաղաքական գործոն այս ամեն ինչում: Քաղաքական առումով շատ կարևոր է: ՀՀ մայրաքաղաքը, որն ընտրողների գրեթե 1/3-ն է ապահովում, հետաքրքիր է, թե ինչ որոշում կկայացնի: Ես վստահ եմ, որ մենք ռեալ շանս ունենք հաղթելու»,- ասաց Սիմոնյանը, ապա հավելեց, որ ԱԺ ընտրություններն էլ ցույց տվեցին, որ իրենք կարողանում են իրենց օգտին քվեարկածների ձայները պահել:  

«Ելք» դաշինքից մեկ այլ թեկնածու` Դավիթ Խաժակյանն էլ նշեց, որ քաղաքի զարգացման` իրենց  տեսլականն առնչվում է քաղաքի արդյունավետ կառավարմանը: «Քարոզարշավի ընթացքում բարձրացնելու ենք Երևան քաղաքի արդյունավետ կառավարման հարցը: Մենք տեսնում ենք, որ քաղաքի բյուջեն արդյունավետ չի օգտագործվում, ձմռանը մենք տեսնում ենք ֆլամինգոներ, այժմ մենք տեսնում ենք զարդարանքներ, որոնք ուղղակի անհարիր են խնդիրներ ունեցող քաղաքում: Այս խնդիրները բարձրացնելով` գնալու ենք ՏԻՄ ընտրություններին»,- հայտարարեց նա:

Խաժակյանը նշեց, որ իրենք Երևան քաղաքից  խորհրդարան անցած 4 թեկնածու ունեն, ինչը իրական է դարձնում ավագանու ընտրություններին մեծամասնություն կազմելու և քաղաքապետ ունենալու իրենց շանսերը:

Իսկ մյուս քաղաքական ուժերի չմասնակցելը Ալեն Սիմոնյանը համարեց հնարավորություն «Ելք»-ի համար: Ըստ նրա` իրենք մեծ շանսեր ունեն հաղթելու ավագանու ընտրություններում, եթե երևանցին ճիշտ քվեարկի: