Պետք է ընտրել քաղաքական կայուն ուժի, ոչ թե անհատների շուրջ ձևավորված անկայուն քաղաքական ուժերին. Բագրատ Եսայան

Այսօր լրագրողների հետ զրույցում ՀՅԴ անդամ, ռեյտինգային ցուցակով Կենտրոն վարչական շրջանում առաջադրված թեկնածու Բագրատ Եսայանն անդրադարձավ քարոզարշավին:

Ըստ նրա` կուսակցությունները քարոզարշավի ներկայանում են իրենց ուժերի ներածին չափով, որոշ տեղերում հանդիպումները կարող են լինել ավելի կամ պակաս մարդաշատ:

Հարցին, թե ինչո՞ւ պետք է ընտրեն Դաշնակցությանը, Բագրատ Եսայանը պատասխանեց. «Եթե Հայաստանում կա քաղաքական ուժ, դա ՀՅԴ-ն է: Ուրախ եմ, որ Դաշնակցության գաղափարները ժամանակի ընթացքում իրագործվում են, թեև ՀՅԴ-ն չունի մեծամասնություն խորհրդարանում: Եվ ես հույս ունեմ, որ այս անգամ ժողովուրդն իր ձայնը կտա Դաշնակցությանը, որովհետև այսօրվա քաղաքական  իրականության մեջ չկա մի գաղափար,  որը Դաշնակցությունը իրականացրած չլինի, այն է` սահմանադրական փոփոխություններ, խորհրդարանական կառավարում: Որքան էլ հարգեմ անհատներին, նրանք  չեն կարող շատ բան որոշել խորհրդարանական կառավարման համակարգում: Այդ առումով որոշ անհատներ ասես հետ են մնացել այսօրվա իրականությունից, որովհետև այսօր ընտրությունը պետք է կատարվի քաղաքական թիմերի ու ծրագրերի միջև»:

Ըստ Բագրատ Եսայանի` ՀՅԴ-ն մեկ օրվա քաղաքական ուժ չէ, այն գոյություն ունի երեք դարերի մեջ, ուստի չի կարող կարճաժամկետ նպատակներ ներդնել: ՀՅԴ-ն քաղաքական ուժ է,  որը պատասխանատվություն է կրում ասածների համար, չէ՞  որ հինգ տարի հետո Դաշնակցությունը չի վերանալու և պետք է պատասխան տա խոստումների համար:

Բագրատ Եսայանը օրինակ բերեց մի դրվագ Վահան Հովհաննիսյանի կյանքից, երբ նա գտնվում էր բանտում: Նրան այդ ժամանակ համագործակցության տարբեր առաջարկներ են արել, քաղաքականությունից հեռանալու առաջարկ են արել, սակայն Վահան Հովհաննիսյանը չի համաձայնել` ասելով. «Եթե ես մենակ լինեի,  ոչ մի կուսակցություն չներկայացնեի, կարող է մտածել այդ առաջարկների կամ համագործակցության մասին:  Բայց որ 105 տարվա կուսակցություն եմ ներկայացնում, ու դատում են այդ կուսակցությանը` ի դեմս ինձ, ապա ես  պատասխանատվություն եմ կրում»:

Բագրատ Եսայանի խոսքով` խոստում տվողներն էլ չեն գիտակցում մինչև վերջ, որ արդեն ապրում են խորհրդարանական կառավարման համակարգում, երբ ամեն տարի պետք է հաշվետվություն ներկայացնեն ու բացատրեն, թե ինչու չկատարեցին այս կամ այն խոստումը:

Ըստ նրա` չպետք է կրկնվեն այնպիսի իրավիճակները, երբ քաղաքական կուսակցությունը, օրինակ` ԲՀԿ-ն, ՀԱԿ-ը, «Ժառանգություն»-ը, մասնատվում են, և ժողովւրդը վերջում չի հասկանում` ումից ինչ պահանջի:

«Ժողովուրդը պետք է ընտրի քաղաքական կայուն ուժի,  որ հետո էլ կարողանա նրանից  պահանջել: Մասնատված ուժերի դեպքում ումի՞ց պահանջի ժողովուրդը: Երբ նախագահական համակարգ էր, էլի մեղադրանքները նույնն էին,  թե փող են բաժանում, դարձանք կիսանախագահական, հետո` խորհրդարանական, էլի ասում են, թե փող են բաժանում: Ասես հին ռելսերից չենք իջնում: Ոչ թե անձին պետք է ընտրել, այլ քաղաքական կայուն ուժին, նրանց ծրագրերը:  Կոչ եմ անում որևէ թեկնածուի ընտրելիս ընտրել քաղաքական  թիմին, հասկացեք` այդ անձը ինչ ուժ է ներկայացնում, արդյո՞ք անհատի շուրջ հավաքված թեկնածուներ են, երբ այդ անհատը չլինի, այդ թեկնածուները կդավաճանե՞ն այդ ուժին, թե՞ ոչ»,- ասաց Բագրատ Եսայանը: