Հաշվեքննիչ պալատը կլինի ոչ թե պատժիչ, այլ կանխարգելիչ մարմին. Յոլյան

Ազգային ժողովում քննարկվում է Վերահսկիչ պալատի նախագահ նշանակելու հարցը: ՀՀ նախագահն այս պաշտոնի համար առաջադրել է Լևոն Յոլյանի թեկնածությունը, ով մի քանի ամիս առաջէներգետիկայի նախարարի պաշտոնն էր զբաղեցնում:

Յոլյանը ելույթում նախ շնորհակալություն հայտնեց Սերժ Սարգսյանին՝ ՎՊ նախագահի պաշտոնում իր թեկնածությունը առաջադրելու համար, այնուհետև հիշեցրեց, որ, սահմանադրական փոփոխությունների համաձայն, Վերահսկիչ պալատը վերանվանվելու է Հաշվեքննիչ պալատ:

«Հաշվեքննիչ պալատը մեծ դեր է ունենալու հանրային կառավարման գործընթացում, ինչը, անշուշտ, կբարձրացնի հանրային ռեսուրսների արդյունավետությունը»,- ասաց Յոլյանը:

Նրա խոսքով` ՎՊ աշխատակիցները չեն կարող լինել քաղծառայողներ, ինչը պալատին կտա պետական համակարգից ավելի անկախ գործելու հնարավորություն: Յոլյանը շեշտեց. «ՎՊ աշխատակիցները պետք է պահեն իրենց քաղաքական չեզոքությունը»:

Անդրադառնալով կոռուպցիայի դեմ պայքարին` ՎՊ նախագահի թեկնածուն հույս հայտնեց, որ կառույցի աշխատակիցները ունեն բավականին կամք և պրոֆեսիոնալիզմ կոռուպցիայի դեմ պայքար մղելու գործում:

«Վերահսկիչ պալատի նախագահի պաշտոնում միշտ պատրաստ կլինեմ հարցերի համընդհանուր քննարկմանը և արդյունավետ լուծումներ գտնելուն: Կողմնակից եմ, որ Վերահսկիչ պալատը ոչ թե պատժիչ, այլ կանխարգելիչ գործունեություն ծավալի»,- եզրափակեց Լևոն Յոլյանը: