Էթիկայի նորմերից ելնելով է, որ Հաշվեքննիչ պալատը ԲԷՑ-ում ստուգումներ չի իրականացրել

«Բարգավաճ Հայաստան» խորհրդարանական խմբակցության պատգամավոր Շաքե Իսայանը երեկ խորհրդարանում Հաշվեքննիչ պալատի նախագահ Լևոն Յոլյանից հետաքրքրվել էր` ինչու է պալատի ուշադրությունից դուրս մնացել «Բարձրավոլտ էլեկտրական ցանցեր» ՓԲԸ-ն:

Հիշեցնենք, որ Իսայանը Յոլյանին հիշեցնում էր էներգետիկայի ոլորտում աշխատած  վեց ամիսների մասին ու  հարցնում` ինչու Հաշվեքննիչ պալատը չի անդրադարձել այդ ժամանակահատվածում ԲԷՑ-ի ստուգումներին:

«Երեկ ես Ազգային ժողովում ներկայացրեցի` կան հաշվեքննության միջազգային ստանդարտներ, կան կոռեկտության ու էթիկայի խնդիրներ և, ընդհանրապես, միջազգային ստարտափերին համահունչ` այն մարդը, որ ինչ-որ մի տեղ աշխատել է, ու, ենթադրենք, որևէ նախարարությունից տեղափոխվել Հաշվեքննիչ պալատ, էթիկայից ելնելով, մի քանի տարի տվյալ նախարարության հաշվեքննությամբ զբաղվելու մասով սահմանափակում ունի»,- ասաց Յոլյանը:

Հետևաբար, ըստ նրա, դրանով է պայմանավորված, որ 2016 –ի գործարքները` ԲԷՑ-ի մասով, պալատը չի ստուգել: Իր ղեկավարած կառույցի փոխարեն, սակայն, ԲԷՑ-ում ստուգումներ է իրականացրել պետական վերահսկողական ծառայությունը:

«Իմ ունեցած տեղեկություններով` այդ ժամանակահատվածի համար լուրջ բաներ չեն եղել: Ոչ վերահսելի ոչ մի բան չի մնացել»,- ամփոփեց Յոլյանը: