Էս խալին եմ սիրահարվել. Նորքի տուն-ինտերնատում ապրող ամուսինների կյանքի պատմությունը (ֆոտո, տեսանյութ)

«Այ, էս խալին եմ սիրահարվել»,- պատմում է Նանուլի Կարախանյանը՝ ցույց տալով իր ամուսնու՝ Խորեն Կարախանյանի դեմքի խալը: 46 տարի միասին են: Ջավախքից Հայաստան տեղափոխված զույգը մինչև Նորքի տուն-ինտերնատում բնակվելը Երևանի Արաբկիր թաղամասում է ապրել:
«Ինձ թաշկինակ ու փոքրիկ հայելի ուղարկեց. եթե չսիրեր, ինչի՞ պիտի ուղարկեր»,- ոգևորված ու հպարտ հիշում է Խորեն պապիկը՝ աստիճանաբար ներկայացնելով իրենց ամուսնության պատմությունը: Բուն թեմայից շեղվելով՝ ժամանակ առ ժամանակ հիշում է զոքանչին. «Նենց զոքանչ ունեի, նենց զոքանչ, էլ ասելու չի, անունն էլ՝ Օլյա»…

Խորեն պապիկի և Նանուլի տատիկի ամուսնությանը կողմ է եղել Նանուլի տատիկի հորեղբայրը ու ապագա փեսային էլ հորդորել՝ փախցնել եղբոր աղջկան: «Ամուսնանալուս ժամանակն էր, Նանոն էլ իսկականից համապատասխան էր: Տեսա ու հասկացա, որ հեչ էլ վատը չի»,- ոգևորված ու ձեռքերն այս ու այն կողմ տանելով` պատմում է Խորեն պապիկը՝ շարունակ նկատողություն ստանալով տիկնոջից. «Կարճ կապի ու ձեռքերով մի' խոսիր»:

«Մի ամիս գնացի, եկա, վերջը պայմանավորվանք, ու փախցրի»,- հիշում է Խորեն պապիկը: «Երազում տեսածը կատարվում է. տեսել էի նրան, ու կատարվեց: Ես 20 տարեկան էի, դե որ իրա հարազատներով, բարեկամներով ամբողջ ամիս գնաց-եկավ, համաձայնեցի, մի փոքր գրություն գրեցի ու դուրս եկա տնից»,- ամուսնուն լրացնում է Նանուլի տատիկը՝ անընդհատ դիպչելով կողքին դրված նոթբուքին, որի էկրանին ֆեյսբուքյան բացված էջ է: «Ես շատ ակտիվ եմ սոցիալական ցանցերում, հարազատներիս հետ եմ շփվում: Բարեկամներից ով ում չի ճանաչել, անգամ տեղն էլ չի իմացել, բոլորին գտել եմ, միացրել եմ ու քաշվել կողքի»,- հպարտանում է Նանուլի տատիկը:

«Օտարություն չենք զգում այստեղ, դրսում ապրող մարդիկ այնքան ուրախ չեն, այնքան զբաղմունք չունեն, որքան մենք»,- ժպտադեմ ասում է Նանուլի Կարախանյանը, ապա պատմում, որ ամեն տարի տարեվերջյան միջոցառմանը պարում են, երգում և ուրախանում… Ուրախության շատ հաստ քողի տակից, սակայն, նշմարվում է հարազատների հանդեպ կարոտը:«Չեն գալիս այցելության»,- ասում է Նանուլի տատիկը և արագ սրբագրում իր խոսքերը. «Դե, ամեն մեկն էլ իր խնդիրներն ունի: Մենք լավ ենք, ուրախ ենք, ոչինչ»…

«Աքլորը գունավոր փետուրներ ունի, գեղեցիկ գույների առումով` շռայլ է, լավ գույներ են, ու կարծում եմ, որ կյանքն էլ գունավոր կդարձնի: Առաջին հերթին զինվորներին, սահմանապահներին եմ մաղթում առողջություն, զգոնություն: Թող իրենց հարազատներից, բարեկամներից անպակաս լինեն»,- ասում է Նանուլի տատիկը:

Լուսինե Հակոբյան

Մանրամասները՝ Yerkir.am-ի տեսանյութում: