Սպորտի նախարարն ու ԱՄՆ դեսպանը քննարկել են համատեղ ծրագրեր

Սպորտի եւ երիտասարդության հարցերի նախարար Հրաչյա Ռոտոմյանն ընդունել է Հայաստանում ԱՄՆ դեսպան Ռիչարդ Միլսին: Կողմերը խոսել են սպորտի եւ երիտասարդության քաղաքականության ոլորտում երկու երկրների համագործակցության եւ համատեղ իրականացվող ծրագրերի մասին, հաղորդում է նախարարության մամուլի ծառայությունը: 

Նախարարը ողջունել է դեսպանին եւ ներկայացրել 2016թ. ընցացքում նախարարության կողմից իրականացված ծրագրերից մի քանիսը:

Նախարարը խոսել է նաեւ Ամերիկայի Միացյալ Նահանգների՝ որպես բասկետբոլային գերտերության փորձն ուսումնասիրելու եւ մեր երկրում կիրառելու մասին: «Ամերիկահայ 7 բասկետբոլիստներ ընդգրկված են ՀՀ բասկետբոլի տղամարդկանց հավաքականի կազմում: Նրանք ամերիկյան բասկետբոլի դպրոցում ձեռք բերած գիտելիքները կիրառում են մեզ մոտ: Ահա սպորտում համագործակցության եւս մեկ փայլուն օրինակ»,- նշել է Հ. Ռոստոմյանը:

Դեսպան Ռ. Միլսի խնդրանքով նախարարը ներկայացրել է նաեւ երիտասարդական քաղաքականության ոլորտում նախարարության կողմից իրականացվող ծրագրերը:

«Ծրագրերը բազմազան եւ բազմատեսակ են: Որպես մեր որդեգրած քաղաքականության կարեւորագույն բաղադրիչ կառանձնացնեմ իրականացվող ծրագրերի մարզակենտրոն լինելը: Բազմաթիվ ծրագրեր ենք մշակել եւ դրանք իրականացնում ենք հատկապես մարզերում»,- տեղեկացրել է Հ. Ռոստոմյանը: 

Ռ. Միլսն իր պատրաստակամությունն է հայտնել՝ ՀՀ-ում ԱՄՆ դեսպանատան կողմից ցուցաբերել անհրաժեշտ աջակցություն՝ ծրագրերի իրականացման գործում եւ հաջողություններ է մաղթել նախարարության բոլոր նախաձեռնություններին: