Նոր տարուն գալու են, կառավարության դիմաց վրաններ խփեն. Զոհրաբյանը Գյումրու բնակիչների խնդիրները բարձրաձայնեց

Կառավարության նախաձեռնությամբ հրավիրված ԱԺ արտահերթ նիստի օրակարգում, ի թիվս մի շարք նախագծերի, ընդգրկված է նաև «Պետական տուրքի մասին» ՀՀ օրենքի նախագիծը: Մինչ նախագծի քննարկումը վարման կարգով խոսեց ԱԺ ԲՀԿ խմբակցության ղեկավար Նաիրա Զոհրաբյանը և բարձրացրեց Գյումրիի Անտառավան 3 թաղամասի 26 շենքի խնդիրը: Նրա խոսքով` բնակիչներն օրհասական վիճակում են:

«Այդ շենքը 4-րդ աստիճանի վթարային չէ, այլ 400-րդ աստիճանի վթարային է: Մարդիկ էվակուացնում են երեխաներին: Նոր տարուն գալու են ու կառավարության դիմաց վրաններ խփեն: Նույն վիճակում է գտնվում Սևեռսկի թաղամասը: Ես սա հնչեցնում եմ որպես ահազանգ, որովհետև վերջին ձնաբուքի ժամանակ ամբողջ ձյունը լցվել է տները»,- ասաց Զոհրաբյանը:

Պատգամավորը պնդեց` եթե շատ արագ ու օպերատիվ այս շենքի հարցը չլուծվի, ապա լուրջ վտանգի առջև կարող են կանգնելու: «Կարող է տունը փլուզվել մարդկանց վրա»,- ասաց նա` հորդորելով կառավարությանը` ականջալուր լինել:

ԱԺ նախագահ Գալուստ Սահակյանը պատգամավորին խնդրեց ընդմիջմանը քննարկել այդ հարց և փորձել լուծում տալ: