Ծիծաղելի և անհեթեթ. Քիրբին` ռուս դեսպանի սպանության հարցում Թուրքիայի հնչեցրած մեղադրանքների մասին

ԱՄՆ ԱԳ նախարարության խոսնակ Ջոն Քիբրին «ծիծաղելի և անհեթեթ» է որակել Թուրքիայի կողմից ԱՄՆ-ի հասցեին հնչեցված մեղադրանքները, թե վերջինս կանգնած է ռուս դեսպան Անդրեյ Կառլովի սպանություն հետևում:

Ըստ Demokrathaber-ի՝ Քիրբին խոսել է սպանությունից հետո իր և Թուրքիայի ԱԳ նախարար Մևլութ Չավուշօղլուի միջև տեղի ունեցած հեռախոսազրույցի մասին: Նա արտահայտել է իր անհանգստությունն այն մասին, որ ՌԴ դեսպանի սպանության մեջ Թուրքիայի իշխանությունները  ամերիկյան և գյուլենական հետքեր են փնտրում:

«Ես չգիտեմ՝ այդ սպանությունն իրականացնողն ինչ դրդապատճառներ է ունեցել, կարծում եմ՝ դուք էլ տեղյալ չեք: Ասածս ինչ է՝ ես նույնպես տեսա սպանությունից հետո նրա բացականչությունները: Պետք է թույլ տանք, որ հետաքննիչներն իրենց աշխատանքն իրականացնեն, որպեսզի հասնենք ճշմարտությանը:  Սակայն բացարձակ ծիծաղելի է Միացյալ Նահանգների` այս սպանությանը աջակցելու, դրա հետևում կանգնած լինելու կամ դիտավորյալ կերպով մաս կազմած լինելու միտքը»,- հայտարարել է Քիրբին:

Նշենք, որ Թուրքիայի ԱԳ նախարար Չավուշօղլուն սպանությունից հետո հայտարարել էր, որ «թե' ՌԴ-ն, թե' Թուրքիան միանգամայն տեղյակ են, որ այս հարձակման հետևում կանգնած է Գյուլենը՝ Գյուլենական շարժումը»: