Եթե չկան ներքին ներդրողներ, մենք չենք կարող համոզել օտարներին. Արսեն Ղազարյան

Այսօր խորհրդարանում լսումներ են կազմակերպվել՝ «Հայաստանի արտաքին քաղաքականության տնտեսական բաղադրիչը» թեմայով, որին մասնակցում են ՀՀ վարչապետ Կարեն Կարապետյանը, ԱԺ պատգամավորներ, բիզնես սեկտորի ներկայացուցիչներ, Հայաստանում միջազգային ընկերությունների ներկայացուցիչներ:

Լսումները նպատակ ունեն մեկտեղել կառավարության, խորհրդարանի, դիվանագիտական ներկայացուցչությունների, միջազգային կազմակերպությունների, մասնավոր գործարար ոլորտի, փորձագետների մոտեցումները, քննարկել արտաքին քաղաքականության մեջ տնտեսական գործոնի արդյունավետ կիրառման հնարավորությունները:

Մինչ ելույթ ունեցող փոխնախարարները, նախարարները, պատգամավորները իրենց  խոսքն ուղղում էին ապագային` ասելով, որ պետք է ակտիվացնեն քայլերը ներդրումների ներգրավման համարև ոչ մի կերպ չէին անդրադառնում խնդիրներին ու խոչընդոտներին,  Հայաստանի արդյունաբերողների ու գործարարների միության նախագահ Արսեն Ղազարյանը խոսեց ներկա վիճակի մասին`  ուշադրությունը բևեռելով սթափ գնահատականների վրա:

«Ի՞նչ պետք է անենք, որ օտարերկրյա ներդրողները համարձակորեն ներդրումներ կատարեն Հայաստանում: Առաջին հերթին պետք է ակտիվանան ներքին ներդրողները: Մինչև մենք աշխուժություն  չմտցնենք ներսում,  դրսի գործարարը չի հավատա ներդրումների բարենպաստ դաշտին, չի մտնի փոքր շուկա, այն դեպքում, երբ մենք շրջապատված ենք թշնամաբար տրամադրված պետություններով` Ադրբեջանով ու Թուրքիայով: Ուստի եթե չկան ներքին ներդնողներ, մենք չենք կարող համոզել օտար ներդրողներին, թե` մեզ մոտ լավ է,  եկեք մեզ մոտ»,- ասաց Արսեն Ղազարյանը:

Նա կարևորեց արդար բիզնես վարելու գործոնը, որը կարող է հավատ ներշնչել օտարերկյա ներդրողներին: Ըստ Արսեն Ղազարյանի` դրսի ներդրողը պետք է հավատացած լինի նաև, որ Հայաստանում օրենքները գործում են, որ ամեն ինչ կարգավորվում է միայն շուկայի օրենքներով, այլ ոչ մենաշնորհային ճնշումներով ուղեկցվող գործընթացներով:

Արսեն Ղազարյանն այնուհետ անդրադարձավ Հարկային նոր օրենսգրքին` ասելով, որ նոր օրենսգրքի խմբագրած տարբերակը նույնպես իրենց սրտով չէ, և դեռ 14 կետի վերաբերյալ ունեն առաջարկություններ:

«2017թ. պետք է վերախմբագրվեն Հարկային նոր օրենսգրքի շատ դրույթներ: Առաջին հերթին պետք է վերանայվի դիվիդենդների հարկման սկզբունքը:  Տեղական ներդրողներին հարկենք 5 տոկոս,  օտարներին` 10 տոկոս` արդեն իսկ անընդունելի է, խտրական է ու չի նպաստի ներդրումների աճին»,- ասաց Արսեն Ղազարյանը:

Նա անդրադարձավ նաև օտարերկրյա ներդրումների մասին նոր օրենքին, որը դեռ չի ներկայացվել ԱԺ-ին` ասելով, որ այն շատ թույլ նախագիծ է, մինչդեռ Հայաստանի նման փոքր շուկա ունեցող երկրի պետք  չէ նման թույլ օրենք:

«Մենք են շահառուն, ուրեմն  պետք է այնպես անենք,  որ օրենքը ուժեղ լինի:  Վարչապետը սկսել է հարկային ու մաքսային բարեփոխումներ, նրա հետ հանդիպման ժամանակ ես ասացի, որ այդ քայլերը հուսադրող են, որ արդեն լույս եմ տեսնում թունելի վերջում:  Բայց դեռ կան խնդիրներ արտահանման ոլորտում, քանի որ արտադրական ծավալներ չունենք: Ամեն օր ԱԻՆ-ը տեղեկություններ է տալիս, այսօր Լարսի անցակետը փակ է կամ բաց է: Բայց հենց Լարսի անցակետն է ԵՏՄ շուկայի հետ կապող միակ ճանապարհն ապահովում:  Անգամ եթե եղանակային պայմանները լավն են, միևնույն է` թողունակությունը քիչ է, և  ակնհայտ է, որ Լարսի հարցը Հայաստանի լուծելիք հարցը չէ»,- ասաց Արսեն Ղազարյանը:

Ի թիվս այլ խնդիրների, նա մատնանշեց ևս մեկ խոչընդոտ` որոշ երկրների հետ վիզաների սահմանափակումը, ինչը չի նպաստում ներդրումներին,  ուստի անհրաժեշտ է վիզաների դյուրացում այդ երկրների հետ:

Ինչ վերաբերում է Հայաստանի զարգացման հիմնադրամին, որին վերապահվում է հիմնական գործառույթը ներդրումների ներգրավման ու ներդրողի աջակցության գործում, Արսեն Ղազարյանը կարծիք հայտնեց, որ Հայաստանի զարգացման հիմնադրամը դեռ «երկունքի, ծննդյան» փուլում է, և որ ներդրումային ծրագրերը իրականում պետք է ոչ թե հիմնադրամները մշակեն, այլ գործարարները: Իսկ, ներդրումային ծրագրերի հետ կապված, քիչ են 10,20 միլիոնանոց ծրագրերը, առևտրային բանկերի տրամադրած տոկոսադրույքները բարձր են ու ոչ նպաստավոր, հետևաբար, բանկերի հետ կապված էլ առաջացել է պատային վիճակ:

Ինչևէ, բոլոր խնդիրներով հանդերձ,  Արսեն Ղազարյանը կարծում է, որ Հայաստանը կապող օղակ է արևելքի ու արևմուտքի միջև, ուստի անհրաժեշտ է համագործակցել` այդ կամուրջն էլ ավելի էֆեկտիվ դարձնելու համար:

Վերջում նա ողջունեց 2 կառույցների` Ներդրումային հիմնադրամի ու Ռազմավարական ծրագրերի կենտրոնի հիմնումը: