Զինվորների ներքնաշորերի հետ կապված խնդիր կա. տեքստիլ ոլորտ են հրավիրվում ներդրողներ

Այսօր կառավարության նիստում հաստատվեց «Սաթենկար» ՍՊԸ-ին ապրանքների ներկրման դեպքում ավելացված արժեքի հարկից 3 տարով ազատելու արտոնությունը: 286.5 միլիոն դրամի չափով ներդրում է կատարվելու, և ըստ ներդրումային ծրագրի՝ ստեղծվելու է 24 աշխատատեղ՝ 94.000 դրամով:

Հարցի մասին զեկուցող` տնտեսական զարգացման նախարար Արծվիկ Մինասյանը նշեց, որ տրիկոտաժի ոլորտը համարվում է գերակա, ուստի ով դիմում է, այս ոլորտում որևէ խոչընդոտ, որևէ հավելյալ բեռ չի դրվում, միայն թե իրականացվեն ծրագրերը, ստեղծվեն աշխատատեղեր:

Վարչապետն արձագանքեց, որ ներդրողներին հրավիրում են այս ոլորտում ներդրումներ անելու: Փաշինյանի խոսքով` զինվորների ներքնաշորերի հետ կապված չլուծվող խնդիր կա, և ՊՆ-ն լրջորեն պետք է զբաղվի այդ հարցով` խնդրի լուծման գործում ներգրավելով տեքստիլ ոլորտի արտադրողներին: «Նախկին մրցույթների հետ կապված խնդիր կա, և պայմանավորվել ենք, որ պետք է հրավիրվեն բոլոր արտադրողները, և բոլորի ներկայությամբ, տեսախցիկների ներքո, պետք է տեղի ունենան բանակցություններ արտադրողների հետ»,- ասաց նա: