Սպիտակի երկրաշարժի 28-րդ տարելիցն է

Այսօր լրանում է Սպիտակի ավերիչ երկրաշարժի 28-րդ տարելիցը: 1988-ի այս օրը տեղի ունեցած երկրաշարժը մեծ ավերածություններ առաջացրեց հատկապես Սպիտակում, Գյումրիում, Վանաձորում, Ստեփանավանում: Ընդհանուր առմամբ, տուժել է 21 քաղաք, 342 գյուղ:

Երկրաշարժի էպիկենտրոնը Շիրակամուտ (նախկին Նալբանդ) գյուղն էր: Աղետի հետևանքով զոհվեց 25 հազար մարդ, անօթևան մնաց 514000 մարդ:

Ուժգնությունը էպիկենտրոնում գնահատվել է 10 բալ: Սպիտակի երկրաշարժը պատկանում է, այսպես կոչված, լրիվ ցիկլի երկրաշարժերին` նախացնցումներ, հիմնական ցնցում, հետցնցում:  Երկրաշարժի տևեց մինչև 5 րոպե, և այդ ընթացքում կրկնվող ցնցումների պատճառով շինությունների մեծամասնությունը չհասցրեց «վերականգնվել» հիմնական ցնցումից:

Նշենք, որ 1988թ. երկրաշարժի ուժգնությունը Սպիտակում գնահատվեց 10, Ստեփանավանում` 9, Վանաձորում` 8-9 բալ:

Երկրաշարժն ընդգրկել է ՀՀ տարածքի մոտ 40%-ը, ուր ապրում էր 1 մլն մարդ: