Արմեն Ամիրյանն ուզում է մշակույթի նախարարների խորհուրդ ստեղծել

Տեղեկացևել էինք, որ երեկ ՀՀ մշակույթի նախարար Արմեն Ամիրյանն իր տանն ընթրիքի էր հրավիրել ՀՀ մշակույթի նախկին նախարարներին:

Yerkir.am-ի հետ զրույցում բանաստեղծ, թարգմանիչ, մշակույթի նախկին նախարար Հակոբ Մովսեսը նշեց, որ նման քայլը` ընթրիքի սեղանի շուրջ հավաքել բոլոր նախարարներին ու զրուցել ոլորտի մասին, շատ դրական է գնահատում:

«Մենք քննարկեցինք մի շարք հարցեր, մասնավորապես` խոսք գնաց մշակույթի պետական կառավարման շարունակականությունից, այսինքն` երբ նոր նախարար է նշանակվում, չպետք է ընդհատվեն նախկինի սկսած գործերը: Ամիրյանն ասաց, որ հենց այդ իսկ պատճառով էլ ուզում են նախարարների խորհուրդ ստեղծել, որպեսզի քննարկվեն ոլորտի խնդիրներն ու անելիքները»,- ասաց Հակոբ Մովսեսը:

Նա նշեց նաև, որ այժմ մշակույթի ոլորտում իր համար գլխավոր հարցը հետևյալն է` արդյո՞ք մշակույթը պետական կառավարման կարիք ունի, եթե ունի, ի՞նչ ձևաչափով պետք է այն կյանքի կոչվի: