Կարծում եմ՝ լուսնից չեք իջել․ Շարմազանով

Հոկտեմբերի 26-ին նախանշված ՀՀԿ համագումարին կհրավիրվեն ներկայացուցիչներ շուրջ 10 կուսակցություններից՝ այդ թվում «Եդինայա Ռոսիա»-ից, Չինաստանի կոմկուսից ու ԵԺԿ-ից, ՀՀԿ-ի Գործադիր մարմնի նիստի ավարտից հետո լրագրողների հետ հանդիպման ժամանակ հայտարարել է ՀՀԿ խոսնակ Էդուարդ Շարմազանովը:

Ինչ վերաբերվում է հարցին, թե ՀՀԿ համագումարում  նախագահի թեկնածուների անուններ կան, թե ոչ, Շարմազանովը պատասխանեց. «Կուսակցության նախագահ է վերընտրվելու Սերժ Սարգսյանը: Կարծում եմ՝ դուք լուսնից չեք իջել, որ մտածեք այլ բան: Ե՛վ կուսակցության շարքերի պահանջն է դա, և՛ ցանկությունն է դա: Մենք հպարտ ենք, որ ՀՀԿ-ի ներկայացուցիչներ ենք, հպարտ ենք, որ կուսակցությունը ունի նման լիդեր: ՀՀԿ-ն մեկ լիդերի կուսակցություն է և մնալու է մեկ լիդերի կուսակցություն: Այդ լիդերը Սերժ Սարգսյանն է»։

Ինչ վերաբերվում է Վարչապետ Կարեն Կարապետյանի եւ պաշտպանության նախարար Վիգեն Սարգսյանի ՀՀԿ-ին անդամակցելու հարցերին, ապա Շարմազանովը կրկին ասաց, որ պետք է չէ բացառել վարչապետի անդամակցությունը կուսակցությանը, իսկ նախարարի Հանրապետական դառնալու հարցն ընդամենը տեխնիկական խնդիր է, քանի որ Վիգեն Սարգսյանն արդեն իսկ հայտարարել է իր այդ ցանկության մասին։