Կայուն եկամտի աղբյուր ստեղծելու մասին հարցն անակնկալի բերեց Սուրեն Կարայանին

Տնտեսական զարգացման և ներդրումների նախարար Սուրեն Կարայանն այսօր խորհրդարանում որևէ կերպ չցանկացավ արձագանքել լրագրողների  հարցերին, որոնք վերաբերում էին կառավարության ներկայացրած նախագծին, որով նախատեսվում է 1000 դրամ հատկացնել հիմնադրամին, որը կոչված է  լինելու ապահովել մարտական գործողությունների ընթացքում զոհված կամ վիրավորում ստացած զինծառայողների ընտանիքների կարիքները: «Ես ի՞նչ գործ ունեմ, այդ հարցերն ինձ չեն վերաբերում»,- շարունակ կրկնում էր նախարարը՝ հորդորելով դիմել համապատասխան նախարարությանը:

Հարցին, թե, ի վերջո, որպես կառավարության ներկայացուցիչ, ինչո՞ւ չի ցանկանում տեսակետ հայտնել, նա կրկին խուսափողական պատասխան տվեց:

Yerkir.am-ը նախարարից հետաքրքրվեց  նաև, թե ինչ փուլում է ապրիլյան ռազմական գործողությունների ընթացքում զոհված զինծառայողների համար կայուն եկամտի աղբյուր ստեղծելու վերաբերյալ` նախկին վարչապետ Հովիկ Աբրահամյանի հանձնարարականը:

Կարայանը, լսելով մեր հարցը, նախ զարմացավ, որ նման հանձնարարական է տրվել իր ղեկավարած նախարարությանը (նախկին՝ էկոնոմիկայի նախարարությունն անվանափոխվել է տնտեսական զարգացման և ներդրումների նախարարություն), ապա հիշեց՝ խոսքն ինչի մասին է և արձագանքեց այսպես. «Հաա, այդ  նախագի՞ծը: Վերջնական փուլին ենք հասել արդեն»: Ապա արագ հեռացավ՝ չցանկանալով կոնկրետացնել ասելիքը: