Իրավահարաբերությունների կարգավորումից հետո կլուծվի զոհվածների ընտանիքների կայուն եկամտի հարցը

Մարտական գործողությունների ժամանակ զոհված զինծառայողների ընտանիքների անդամների համար կայուն երկարաժամկետ եկամուտ ապահովելու մասին հարցի քննարկումները կառավարությունում գտնվում են ավարտական փուլում. այսօր լրագրողներին ասաց աշխատանքի և սոցիալական հարցերի նախարար Արտեմ Ասատրյանը:

Նրա խոսքով՝ կառավարությունը պետք է հաստատի անհրաժեշտ օրենսդրական իրավական ակտերը, բացի այդ` օրենսդրական բաց կա մարտական գործողություններին կամավոր մասնակիցների և նրանց կարգավիճակի առումով:

«Սոցիալական երաշխիքների առումով հստակեցում է պետք՝ մարտական գործողությունների ժամանակ զոհվածների, մարտական գործողությունների գոտում գտնված, բայց զինվորական ծառայության պարտականությունները կատարելիս զոհված զինծառայողների մասով: Խնդիր կա` աշխատանքային իրավահարաբերությունների հետ կապված, նախատեսել ենք համապատասխան օրենսդրական նախաձեռնություն` աշխատանքային օրենսգրքի հետ կապված, որ համապատասխան երաշխիքներ տրամադրվեն`աշխատանքի տրամադրման առումով»,- ասաց նախարարը՝ հավելելով, որ այդ աշխատանքները ընթացքի մեջ են:

Նախարարը հավելեց, որ առաջարկները ներկայացվել են վարչապետին, տրվել են հանձնարարականներ պետական կառավարման մարմիններին, և առաջիկայում այդ ամենը կներկայացվի հանրությանը: