Ավստրիայի 6 կուսակցություն Թուրքիայի դեմ համատեղ հռչակագիր է ստորագրել

Ավստրիայի խորհրդարանում խմբակցություններ ունեցող 6 կուսակցություն Թուրքիայի դեմ համատեղ հռչակագիր է ստորագրել՝ կոչ են անելով առկախել Թուրքիա-ԵՄ բանակցությունները. տեղեկացնում է Ermenihaber-ը:

Ըստ թուրքական Abhaber լրատվամիջոցի` Ավստրիայի Սոցիալ-դեմոկրատական կուսակցության խմբակցության նախագահ Անդրեաս Շիդերը, Ժողովրդական կուսակցության  խմբակցության նախագահ Ռայնհոլդ Լոպատկան, «Ազատություն» կուսակցության նախագահ Հանս-Քրիստիան Ստրաչեն, Կանաչների կուսակցության պատգամավոր Այգյուլ Բերիվան Ասլանը, «Նոր Ավստրիա» կուսակցության խմբակցության նախագահ Մատիաս Շտրոլցը և Team Stronach կուսակցության  խմբակցության նախագահ Ռոբերտ Լուգարը խորհրդարանում տեղի ունեցած համատեղ մամուլի ասուլիսում ներկայացրել են հռչակագրի բովանդակությունը:

Ավստրիացի գործիչները նշել են, որ հռչակագրում կոչ է արվել առկախել Թուրիքա-ԵՄ բանակցությունները, ինչպես նաև ազատ արձակել ձերբակալված` Թուրքիայի ընդդիմադիր, քրդամետ Ժողովուրդների  դեմոկրատական կուսակցության (ԺԴԿ-HDP) անդամ պատգամավորներներին ու լրագրողներին:

Հռչակագրում, մասնավորապես, նշվել է, որ հուլիսի 15-ին Թուրքիայում տեղի ունեցած հեղաշրջման փորձից հետո երկրում հայտարարված արտակարգ դրության շրջանակներում տեղի ունեցող հետապնդումներն ու ձերբակալությունները անհանգստացնող են:

Նշենք, որ ավելի վաղ Ավստրիայի ԱԳ նախարար Սեբաստիան Կուրցը հայտարարել էր, որ բացառում է Եվրամիությանը Թուրքիայի անդամակցությունը:  Իսկ 2016 թվականի օգոստոսի 20­-ին Քուրդիստանի բանվորական կուսակցության կողմնակիցների` Ավստրիայի մայրաքաղաք Վիեննայում անցկացրած ցույցի պատճառով Ավստրիայում Թուրքիայի դեսպանը հետ է կանչվել Անկարա, եւ արդեն 3 ամիս է, ինչ Թուրքիան Ավստրիայում դեսպան չունի: