Դիզվառելիքի ու պարարտանյութի սուբսիդավորումը չի զարգացնում գյուղատնտեսական ոլորտը. նախարար

Գյուղատնտեսության նախարար Իգնատի Առաքելյանը նպատակահարմար չի համարում գյուղացիներին տրվող դիզվառելիքի և պարարտանյութի սուբսիդավորումները: Կառավարության նիստից հետո պատասխանելով լրագրողների հարցերին` նա ասաց. «Համարում եմ, որ դա աննպատակահարմար է, օգուտ չի տալիս գյուղատնտեսության զարգացմանը: Այն գյուղատնտեսությանը  պահում է մի վիճակում, որում մենք կանք, իսկ մենք պետք է մտածենք զարգացնելու մասին»:

Հարցին` եթե օգուտ չկա, ինչո՞ւ է սուբսիդավորման վերաբերյալ ծրագիրը ներառվել նաև 2017 թվականի պետական բյուջեում, նախարարը պատասխանեց, որ ներառվել է, որովհետև նոր մեխանիզմը դեռ  պատրաստ չէ ներդրման: «Ես մտածում եմ` նորը ներդնեմ, հինը քանդեմ, որովհետև հինը քանդել, առանց նորը հիմնելու, արդյունավետ չէ»,- ասաց նախարարը:

Դիտարկմանը, թե այս տարիների բյուջետային հատկացումներն անիմաստ է եղել, նա պատասխանեց, որ ամեն ժամանակահատված  ունեցել է իր որոշումը, հաշվարկները: «Ոչ մի բան անիմաստ չի եղել, բայց այսօր մենք համարում ենք, որ դա պետք է փոխվի: Այսօր մենք մտածում ենք, որ գյուղատնտեսության մեջ պետք է կիրառենք նոր միջոցներ` նոր գյուղատնտեսական ֆերմաներ կառուցելու համար»,- ասաց գյուղատնտեսության նախարարը: