Կառավարության սահմանած կարգով էլեկտրաէներգիայի սուբսիդավորումը շարունակվում է. Երվանդ Զախարյան

Այսօր լրագրողների հետ զրույցում ՀՀ էներգետիկայի և բնական պաշարների նախարար Երվանդ Զախարյանը հերքեց տարատեսակ մեկնաբանություններն այն մասին, թե էլեկտրաէներգիայի սուբսիդավորումը մասամբ չի կատարվում: «Ես պատասխանատու հայտարարում եմ, որ սուբսիդավորումը շարունակվում է կառավարության սահմանած կարգով»,- ասաց նա:

Ինչ վերաբերում է Հայաստանի տարածքով Իրանից Վրաստան գազի մատակարարման առնչությամբ բանակցություններին, ապա նախարարը նշեց, որ ՀՀ իշխանությունների հետ նման բանակցություններ չեն տարվել: Միաժամանակ հայտնեց, որ նախորդ դեկտեմբերին Երևանում կայացած` Հայաստանի, Ռուսաստանի, Վրաստանի և Իրանի էներգետիկայի նախարարների քառակողմ բանակցությունների շրջանակում ևս այդ թեմայով քննարկումներ չեն եղել: Զախարյանը հիշեցրեց, որ Վրաստանի և ռուսական «Գազպրոմ»­ի միջև ընթանում են գազի մատակարարման բանակցություններ, սակայն արդյունքների վերաբերյալ որևէ տեղեկատվություն դեռևս չկա: