Նշաչափը շատ համարձակ էր վերցված, վարչապետը խոսքն անկեղծ էր ներկայացնում. Վարդան Այվազյան

Կառավարության ծրագիրը բազում արդյունավետ կետեր է պարունակում, կան հայեցակարգեր, միջոցառումներ, որոնք երկարաժամկետ են. այսօր խորհրդարանում լրագրողներին ասաց ՀՀԿ-ական պատգամավոր Վարդան Այվազյանը:

«Եթե ապրիլին նույն կառավարությունը մնա, պետք է կրկին գա և ներկայացնի: Իրավակարգավորման նորմերով` դա պետք է տեղի ունենա: Բարոյապես ճիշտ չի լինի երկարաժամկետ ծրագիր ներկայացնել: Նախանշանները հստակ դրված են, բայց կան դրույթներ, որոնք երկարաժամկետ են»,– նշեց նա՝ հավելելով, որ ծրագրի մեջ կան նախադրյալներ, որոնք պետք է երկարաժամկետ իրագործվեն:

«Երբ մենք քննարկում ենք այդ ծրագիրը, տեսնում ենք, որ կան կարճաժամկետ իրականացման ծրագրեր: Ինչ վերաբերում է վեց ամսվան, ասեմ, որ մենք դե ֆակտո ամրագրել ենք` եթե ապրիլյան ընտրություններից հետո նույն կազմով լինի, նորից պետք է գա ԱԺ և խորհրդարանին ներկայացնի իր ծրագիրը: Իհարկե, կարող է նաև նույն ծրագիրը բերել»,- նշեց Այվազյանը:

Նա նաև ընդգծեց, որ եթե վարչապետը ներկայացներ երկարաժամկետ, օրինակ` հինգ տարվա ծրագիր, գործընկերները կդժգոհեին: «Կասեին՝ դու ի՞նչ իրավունք ունես` հինգ տարով ես ներկայացնում, եթե վեց ամսվա համար ես նշանակված: Նշաչափը շատ համարձակ էր վերցված, վարչապետը խոսքն անկեղծ էր ներկայացնում, նա ավելի շատ տնտեսական լեզվով էր խոսում»,- ասաց Այվազյանը: