Հայաստանի ու Արցախի անվտանգության պահպանման ոլորտում կառավարությունը չի խնայելու ջանք ու միջոց. Կարեն Կարապետյան

Այսօր ԱԺ արտահերթ նիստում քննարկվում է նոր կառավարության ծրագիրը: Այն ներկայացնում  է վարչապետ Կարեն Կարապետյանը:

Վարչապետի խոսքով` եղած աշխարհաքաղաքական ու տնտեսական զարգացումներում Հայաստանի տնտեսության առկա կառուցվածքը, ստանդարտ մոտեցումների դեպքում, չի կարող ապահովել առաջընթացի այն տեմպերը, որոնք համահունչ են մարտահրավերներին: Ուստի անհրաժեշտ է խորությամբ վերլուծել, վերաիմաստավորել տնտեսական զարգացման մասին պատկերացումները , մոտեցումները, հատկապես` պետական կառավարման, տնտեսական հաշվառման, վիճակագրական հիմքերի, տնտեսական ներուժի, մրցակցության վերաբերյալ: Կարեն Կարապետյանի խոսքով` կառավարության առջև դրված է պահանջ` իրականացնել կառավարման համակարգի և տնտեսության վիճակի հստակ ախտորոշում, կարևորագույն խնդիրների առարկայական վերլուծություն` առաջարկելով թե' կարճաժամկետ, թե' երկարաժամկետ միջոցառումների ու ռազմավարության հետ կապված ծրագրեր:

Երկարաժամկետ ռազմավարական ծրագրերի մշակման համար  կառավարությունը ստեղծում է ռազմավարական նախաձեռնությունների կենտրոն, որտեղ նշված խնդիրների լուծմամբ կզբաղվեն Հայաստանի ու Սփյուռքի առաջատար մասնագետներն ու փորձագետները:

Կառավարության առջև դրված ռազմավարական խնդիրներից վարչապետը ընդգծեց մի քանիսը: Հայաստանի անվտանգության ու պաշտպանության հարցը երկրի թիվ մեկ խնդիրն է, երկրի առջև ծառացած ռազմական սպառնալիքները պահանջում են ունենալ մարտունակ, մշտապես կատարելագործվող, արդիականացվող, հասարակության վստահությունն ու աջակցությունը  վայելող պաշտպանության համակարգ:

«Հավաստիացնում ենք ձեզ, որ անվտանգության ոլորտում կառավարությունը չի խնայի ոչ մի միջոց և ջանք` Հայաստանի ու Արցախի դեմ ռազմական սպառնալիքները չեզոքացնելու , բավարար ռազմական կարողությունների ստեղծման, տարածաշրջանում ռազմական հավասարակշռության պահպանման համար»,- ասաց վարչապետը: