Պատգամավորը բռնաբարել է մյուս պատգամավորին, նախարարը անդաստիարակ է. Ուրիխանյանի սկանդալային բացահայտումները չստացվեցին

Այսօր ԱԺ նիստում կառավարության հետ հարցուպատասխանի ժամանակ ԱԺ պատգամավոր Տիգրան Ուրիխանյանը հարց ուղղեց վարչապետին: Նշենք, որ պատգամավորը երկու օր առաջ լրագրողներին ասել էր, թե շատ կարևոր բացահայտում ունի անելու կառավարության հետ հարցուպատասխանի ժամանակ:

Մինչ հարցը հնչեցնելը Ուրիխանյանն ասաց, որ Էդուարդ Շարմազանովի՝ իրեն ուղղված ներողությունը ընդունել է ի գիտություն և ցավում է, որ Շարմազանովն այդ ներողությունը հրապարակավ հնչեցնելու համարձակություն չունեցավ: Ապա պատգամավորը խոսեց մի կայքի մասին, որը սկանդալային վերնագրերով նյութեր է տեղադրում, սկանդալային բովանդակությամբ նյութեր տպագրում, և կայքի խմբագրին պետական բյուջեից տրվել է 21 միլիոն դրամ` որպես արտոնյալ գյուղատնտեսական վարկ: Նա ընթերցեց այդ կայքի վերնագրերից մի քանիսը. «Նախարարը անդաստիարակ է», այսինքն` քաղաքական գործիչը դիվերսանտ է, «Նախկին նախագահը կործանեց Ղարաբաղը», գործող պատգամավորներից երկուսի մասին գրված է, որ մեկը բռնաբարել է մյուսին, ԱԺ փոխխոսնակներից մեկի մասին էլ, որ նա բութ է ու շատակեր, իսկ գործող վարչապետի մասին, որ նա ենթականերից պահանջում է գողանալ: Պատգամավորը տարակուսեց` ինչո՞ւ է նման կայքի խմբագրին  վարկ տրվել, որն այդ խմբագիրը չի էլ վերադարձրել:

ԱԺ նախագահը նշեց, որ պատգամավորը կարող է հարցը գրավոր ուղարկել կառավարություն: