Գյումրին ընդդիմադիր քաղաք չէ. Մարտուն Գրիգորյան

ԱԺ պատգամավոր Մարտուն Գրիգորյանը, ով Գյումրու ՏԻՄ ընտրություններում սատարում էր «Բալասանյան» դաշինքին, այսօր խորհրդարանում, լրագրողների հետ զրույցում անդրադառնալով երեկ տեղի ունեցած` տեղական ինքնակառավարման մարմինների ընտրություններին, նշեց, թե ընտրախախտումների մասին ահազանգեր եթե եղել են, ապա դրանք չեն ազդել արդյունքների վրա:

«Ես նմանատիպ ինֆորմացիա չունեմ, ամբողջ օրը հետևել եմ, չկա այն ընտրախախտումը, որ լուրջ ազդեցություն կարող է ունենալ»,- ասաց Գրիգորյանը:

Անդրադառնալով ԲՀԿ-ի այն հայտարարությանը, թե պատրաստվում են բողոքարկել ընտրությունների արդյունքները, որովհետեւ հիմքեր կան, նա նշեց` թող բողոքարկեն, եթե հիմքեր տեսնում են:

Հարցին, թե ինչո՞ւ որոշեց սատարել «Բալասանյան» դաշինքին, պատգամավորը պատասխանեց. «Ինձ համար կարեւոր է եղել է կատարված աշխատանքը եւ կատարվելիք աշխատանքը, իսկ քարոզարշավի ընթացքում դաշինքը ներկայացրել է իր կատարած եւ կատարելիք աշխատանքները»:

Գրիգորյանի խոսքով` դեռեւս հստակեցված չէ իր մանդատի հարցը: Խորհրդարանական ընտրություններին ինքը առաջադրվելու է, իսկ թե ո՞ր կուսակցության համամասնական ցուցակով, չի կարող այս պահին ասել:

Անդրադառնալով ընդդիմադիր կուսակցությունների պարտությանը Գյումրիում` պատգամավորը նշեց. «Բոլորը պետք է հետեւություններ անեն: Այն, որ ասում են` Գյումրին ընդդիմադիր քաղաք է, եւ ով մտքին դնի, կմտնի Գյումրի եւ ձայներ կտանի, թող ինքնախաբեությամբ չզբաղվի: Գյումրեցիները կուշտ են, հոգնել են, զզվել են կեղծ ընդդիմադիր շոուներից, մեր քաղաքին պետք է աշխատանք»: