Բնական է, որ Բալասանյանն ինձ է սատարում. Մարտուն Գրիգորյան

ԱԺ ՀՀԿ խմբակցության պատգամավոր Մարտուն Գրիգորյանը Yerkir.am-ի հետ զրույցում նշեց, որ իրենց թիմում ընդհանրապես լարվածություն չկա, կան նորմալ ընտրական հարաբերություններ:

Գրիգորյանը չհերքեց այն տեղեկությունները, թե Գյումրու քաղաքապետ Սամվել Բալասանյանն իրեն է սատարում: «Չէ, սուտ չի, որ Բալասանյանն ինձ է սատարում, դա բնական բան է»,- ասաց նա:  

Իսկ թե ինչո՞ւ է բնական, Գրիգորյանը դա բացատրեց նրանով, որ քաղաքապետի ընտրություններին էլ ինքն իր թիմով սատարել է քաղաքապետին, քաղաքապետի կողքին է կանգնել, և նա ընտրվել է:

Ինչ վերաբերում է իր և Արման Սահակյանի հարաբերություններին, մեր զրուցակիցն ասաց. «Իմ պատգամավոր գործընկերն է, նորմալ ընկերական հարաբերություններ ունենք Արմանի հետ, լարվածություն որտեղի՞ց: Արմանի ետ նորմալ հարաբերությունների մեջ ենք, աշխատում ենք, թիմային գաղափարն ենք դրել մեր առաջ, որ առաջինը թիմը նորմալ արդյունքներ ցույց տա: Հետո ամեն մեկս մեր մասին կմտածենք»:

Շիրակի մարզում ՀՀԿ ռեյտինգային ցուցակով առաջադրված` ՀՀԿ խմբակցության պատգամավոր Սուքիաս Ավետիսյանն էլ մեզ հետ զրույցում նշեց, որ իրենց թիմում ոչ մի լարվածություն էլ չկա, և որ դա ապատեղեկատվություն է:

Ինչ վերաբերում է Սամվել Բալասանյանի` Մարտուն Գրիգորյանին սատարելուն, Ավետիսյանը նշեց, որ Բալասանյանն իրենց բոլորին էլ սատարում է: «Ո՞վ ասաց, որ Բալասանյանը միայն Մարտուն Գրիգորյանին է սատարում, նա բոլորիս էլ սատարում է»,- ասաց պատգամավորը:

Ի պատասխան դիտարկմանը` Մարտուն Գրիգորյանն է ասել այդպես, կրկնեց, որ իրենց բոլորին էլ սատարում է Բալասանյանը:

Նշենք, որ մամուլում լուրեր են հայտնվել, թե Շիրակի մարզում ՀՀԿ ռեյտինգային թեկնածուների միջև լարվածություն կա, մասնավորապես` Մարտուն Գրիգորյանի և Արման Սահակյանի միջև: