Իշխանությունը հասկացավ, որ դատարկ խոստումներով գյումրեցիներին հնարավոր չէ կերակրել. Մարտուն Գրիգորյան

ԱԺ նիստում քննարկվում է ՀՀ  եւ Վերակառուցման եւ զարգացման եվրոպական բանկի միջեւ 2016 թվականի մայիսի 11-ին ստորագրված «Գյումրիի քաղաքային ճանապարհներ» վարկային համաձայնագիրը:

ԲՀԿ խմբակցության պատգամավոր, գյումրեցի Մարտուն Գրիգորյանը նշեց, որ ճշտել է հիմնական զեկուցողից, որ ՀՀ նախագահի խոստման շրջանակներում է գտնվում այդ համաձայնագիրը:

«Շնորհակալ եմ ՀՀ նախագահից, որ իր  խոսքը գործ դարձրեց: Ես մի քանի հանդիպում եմ ունեցել նախագահի հետ` նրան ներկայացնելով Գյումրու փողոցների վիճակը: Գյումրիում ներկայումս պիլոտային ծրագիր ենք իրականացնում` քարապատման եղանակով երկրորդային փողոցները բարեկարգելու»,- ասաց պատգամավորը:

Նա ներկայացրեց Գյումրու ավտոկայանի անմխիթար տեսքը` զբոսաշրջիկների համար ներկայանալի լինելու առումով: Պատգամավորի խոսքով` այսքան վարկեր են վերցվում Գյումրիի զարգացման համար, բայց իրականում քիչ և անորակ աշխատանք է իրականացվում: Այդ առումով նա կարևոր համարեց գյումրեցիների պահանջատեր լինելը, որի արդյունքում իշխանությունը հասկացավ, որ դատարկ խոստումներիով հնարավոր չէ գյումրեցիների սիրտը շահել, նրանց ականջը շոյել, և անցել են գործուն քայլերի:

Ոչ էլ, ըստ Գրիգորյանի, հնարավոր է ընտրություններից  ընտրություն գյումրեցու թասիբի մասին խոսելով` նրանց ուշադրությունը շեղել: «Գյումրեցիները ամեն ինչ հասկանում են»,- ասաց նա: