Մեր կանխատեսածից մի քանի տոկոսով ավելի բարձր են եղել արդյունքները. Վահրամ Բաղդասարյան

ՀՀԿ խմբակցության ղեկավար Վահրամ Բաղդասարյանն այսօր խորհրդարանում, պատասխանելով  լրագրողների  հարցին, թե ՏԻՄ ընտրությունների ժամանակ ՀՀԿ-ն, փաստորեն, չի հաղթահարել սահմանված շեմը, և պետք է դաշինքներ լինեն, քննարկումներ կա՞ն նման պայմանավորվածությունների շուրջ, ասաց. «Ես խնդրում եմ չշտապել: Պաշտոնական տվյալները կլինեն, և երբ վերջնական տոկոսները կլինեն, կլինեն նաև բանակցություններ»:

Հարցին` իսկ եթե ընդդիմությունը դաշինք կազմի՞, պատասխանեց. «Մենք որևէ բան չենք բացառում, բայց, համենային դեպս, եթե դուք տեսնում եք պատկերն ու իրավիճակը, ինձ թվում է, որ հավանականությունն ավելի շատ է իշխանության հետ դաշինք կազմելու: Մենք խտրականություն չենք դնում, թե ում հետ դաշինք կկազմենք, այն բոլոր քաղաքական ուժերը, որոնք հաղթահարել են շեմը, կլինեն բանակցություններ: Որոնց հետ մեր նպատակները, մեր ծրագրերը կունենան եզրեր, մենք պատրաստ ենք դաշինք կազմել»:

Խոսելով ընտրությունների ընդհանուր արդյունքների մասին՝ Բաղդասարյանն ասաց. «Մենք հասկացանք, որ խորհրդարանական համակարգն արդարացված է մրցակցային պայքարում, և տեսաք, թե որակական տեսանկյունից ինչպիսի արդյունքներ գրանցվեցին: Նաև մի քանի տոկոս մեր կանխատեսածից ավելի բարձր է եղել, նախօրոք մենք համեստություն էին անում: Վանաձորում մենք կանխատեսում էինք 35 տոկոս: Ավելի մրցակցային էր Գյումրին, այնտեղ պարզապես քիչ կուսակցություններ հաղթահարեցին շեմը` ընդամենը չորս կուսակցություն»:

Բաղդասարյանն անդրադարձավ Սամվել Բալասանյանի այն դիտարկմանը, թե պասիվություն է նկատել՝ ընտրողների մասնակցության առումով: «Ասեմ, որ ակտիվությունը բավականին ցածր է եղել, և միայն պարոն Բալասանյանը չէ, որ բողոքել է ակտիվությունից: Դրանից մենք պետք է հետևություններ անենք»,- ասաց նա:

ՀՀԿ-ականի խոսքով՝ ՏԻՄ ընտրություններում գրանցված արդյունքերը բավարար են:

Հարցին, թե ժողովուրդը մշտապես բողոքում է ՀՀԿ-ից, իշխանություններից, հանրահավաքներ է անում, բայց ընտրությունների ժամանակ այդ ի՞նչ կախարդական փայտիկ է օգտագործում, որ կարողանում է այդպիսի արդյունքներ արձանագրել, Բաղդասարյանը պատասխանեց. «Բնականաբար, միշտ բողոքում են ուժեղներից: Հանրահավաքների ժամանակ հավաքված մարդիկ խոսում են հանրության անունից, բայց ընտրություններն ամնենալավ ինդիկատորն են, ցուցանիշն են, առավել ևս` այս ընտրությունները, նաև` Գյումրիի ու Վանաձորի, որոնք քաղաքական ընտրություններ էին, ոչ թե՝ անհատների: Դժգոհ մասսան կա, և դրանից ՀՀԿ-ն պետք անի հետևություններ: Իրոք, ունենք պրոբլեմներ, և մեր որդեգրած ճանապարհը, հապաղելու ճանապարհ չունենալը գալիս է նրանից, որ մենք հաշվի ենք նստում այդ բողոքող մասսայի հետ, որոնց բողոքներ մի մասն արդարացված է»:

Բաղդասարյանը խոսեց նաև Նիկոլ Փաշինյանի մասին. «Քաղաքացիական պայմանագիր» կուսակցության նախագահ Նիկոլ Փաշինյանը շատ ազնիվ ձևով ասում էր, որ շատ ծանր պարտություն են կրել և պետք է անեն հետևություններ: Ես` որպես քաղաքական գործիչ, անընդհատ քննադատել եմ, որ այսքան քաղաքական ուժեր, որ անընդհատ ասում են, թե ՀՀԿ-ն իրեն սպառել է, ՏԻՄ ընտրությունների ժամանակ թեկնածուներ չէին ունենում: Այս ընտրություններում բավականին ակտիվություն կար»: