Չի եղել մի հարկային օրենսգիրք, որը քննադատության արժանացած չլինի. Վահրամ Բաղդասարյան

ՀՀԿ խմբակցության ղեկավար Վահրամ Բաղդասարյանն այսօր խորհրդարանում լրագրողների հետ զրույցում, անդրադառնալով նոր հարկային օրենսգրքի շուրջ հնչող քննադատություններին, ասաց, որ շուրջ 15 տարի է, ինչ խոսվում է նոր հարկային օրենսգիրք ունենալու մասին:

«Եթե նայեք արխիվները` իննսունականներից այդ հարցերը բարձրացրել են: Մենք պետք է ունենանք այնպիսի հարկային օրենսգիրք, որ պատասխաններ տա հարցերին, մի օրենսգիրք, որը երկու-երեք տարի փոփոխության չենթարկվի, որ հարկատուները կարողանան աշխատել: Հաճախակի փոփոխությունները բացասական ազդեցություն են ունենում տնտեսության վրա»,- ասաց նա:

Բաղդասարյանն ընդգծեց, որ այսօր ներկայացված հարկային օրենսգիրքը մշակվել է շուրջ յոթ տարի, և իրենք քաղաքական ուժերին կոչ են արել առաջին ընթերցմամբ կողմ քվեարկել նախագծին, որից հետո բոլոր առաջարկությունները կքննարկեն: Պատգամավորը վստահեցրեց նաև, որ օրենսգիրքը խորհրդարանում դեռ լուրջ քննարկումներ է անցնելու. բոլոր շահագրգիռ մարմինների հետ քննարկում է լինելու, կազմակերպվելու են լսումներ, որից հետո է միայն դրվելու է վերջնական քվեարկության:

Հարցին, թե մտավախություն չկա՞, որ նոր օրենսգիրքը կհանգեցնի կառավարություն-օլիգարխ հակասության, Բաղդասարյանը պատասխանեց, թե չի եղել մի հարկային օրենսգիրք, որը քննադատության արժանացած չլինի, բայց քննակումների արդյունքում հաջողվել է գալ ընդհանուր հայտարարի:

Դիտարկմանը` այսինքն՝ ՀՀԿ-ին կհաջողվի լռեցնել օլիգարխներին, արձագանքեց, որ լռեցնելու համար պետք չէ անհանգստանալ, պարզապես պետք է լսել մարդկանց առաջարկները և քննարկել: «Իհարկե, պետք է հաշվի նստենք մարդկանց հետ, լսենք նրանց առաջարկությունները, բայց ոչ թե առանձին ոլորտի հաջողություն տալով պետք է առաջնորդվենք, այլ` ընդհանուր տնտեսությանը»,- եզրափակեց Վահրամ Բաղդասարյանը: