Ձևեք ձեր կառավարությունը ում վրա ոնց ուզում եք. Նաիրա Զոհրաբյանը դժգոհ է

Այսօր կառավարության նախաձեռնությամբ ԱԺ արտահերթ նիստ է հրավիրվել: Օրակարգում են մի շարք օրենքներ, Հարկային նոր օրենսգիրքը և կառավարության կառուցվածքային փոփոխությունների մասին հարցը:

ՀԱԿ խմբակցության ղեկավար Լևոն Զուրաբյանը իր դժգոհությունը հայտնեց կառավարության ներկայացրած օրակարգի վերաբերյալ` ասելով, որ ոչ թե պետք էր 22 օրենք «ճխտել» օրակարգում, այլ ներկայացնել միայն կառուցվածքային փոփոխությունների մասին հարցը:

«Կառավարությունը ցույց է տալիս, որ շատ նման է իր նախորդին, և դիտարկում է խորհրդարանը որպես դակող ու կամակատար մարմին»,- ասաց նա:

ԱԺ նախագահ Գալուստ Սահակյանն արձագանքեց, որ դա միայն պատգամավորի տեսակետն է, այդի կարծիքը խորհրդարանի մեծ մասը չի կիսում:

Լեւոն Զուրաբյանի դժգոհությանը միացավ ԲՀԿ խմբակցության ղեկավար Նաիրա Զոհրաբյանը` ասելով, որ կառավարությունը խնդիր ունի հերթական անգամ կառավարությունը վերաձևելու, ինչ-որ մեկին նախարար նշանակելու, ինչ-որ նոր կոմիտե ստեղծելու, բերվել է նաև տխրահռչակ Հարկային նոր օրենսգիրքը, սակայն պատգամավորների մեծ մասն այս օրերին զբաղված է ՏԻՄ քարոզարշավով և չի կարող ներկա գտնվել արտահերթ նիստի քննարկումներին:

«Սա անհարգալից վերաբերմունք է խորհրդարանի նկատմամբ, ձևեք ձեր կառավարությունը ում վրա ոնց ուզում եք»,- ասաց Նաիրա Զոհրաբյանը:

Գալուստ Սահակյանը նրան էլ արձագանքեց` ասելով, որ Հարկային օրենսգրքի քննարկումներին պատգամավորների մեծ մասը չէր մասնակցել, իսկ այն լրջորեն փոփոխության է ենթարկվել: «Ի՞նչ է նշանակում` ՏԻՄ ընտրությունների են մասնակցում, ի՞նչ է,  խորհրդարանն ընդհանրապես չպետք է աշխատի, ինչ է` դուք գնում եք քարոզարշավի»,- ասաց նա: