Նաիրա Զոհրաբյանը զայրացած է մերօրյա նապոլեոնների վրա

Այսօր լրագրողների հետ զրույցում ԱԺ ԲՀԿ խմբակցության քարտուղար Նաիրա Զոհրաբյանը խոսել է կառավարության` օրինագծերը հապճեպ ներկայացնելու գործելաոճի մասին:

Նրան զարմացնում է, որ որոշ պատգամավորներ չեն վիրավորվում դրանից: Պատգամավորի խոսքով՝ կառավարությունը բացահայտ անհարգալից վերաբերմունք է դրսևորում խորհրդարանի նկատմամբ` ուրբաթ կեսգիշերին կամ երկուշաբթի առավոտյան նախագծերը ճանաչելով անհետաձգելի ու ներկայացնելով խորհրդարան: «Եթե իրենց, այսպես ասած, ինտելեկտուալ IQ -ն բարձր է, եւ իրենք Նապոլեոնի որոշ հատկանիշներ ունեն եւ, ասենք, ժամը 23:00-ին տալիս են նախագծերը, ապա ես կառաջարկեմ այդ բոլորին ներկայացնել Գինեսի գրքում` որպես նորօրյա նապոլեոններ: Չի կարելի այդքան քծնել սեփական կառավարությանը»:

Ըստ Զոհրաբյանի` խորհրդարանը պետք է ունենա արժանապատվություն, կառավարությանը ստիպի հարգել ՀՀ Ազգային ժողովը: