Ողբերգական դեպք` Վանաձորում. 5-ամյա երեխայի ծնողներն այդպես էլ շտապօգնություն չեն կանչել

Վանաձորում օրերս դժբախտ դեպք է տեղի ունեցել. 5-ամյա աղջիկը տարեկից եղբոր հետ խաղալիս անզգուշաբար եռման ջուրը շրջել է իր վրա: Դեպքը տեղի է ունեցել օգոստոսի 31-ին, սակայն երեխայի ծնողները շտապօգնություն այդպես էլ չեն կանչել: 4 օր անց երեխան մահացել է:

Yerkir.am-ին Վանաձորի շտապօգնության բժիշկներից Արթուր Սիմոնյանը հայտնեց, որ սեպտեմբերի 4-ին իրենց մոտ կանչ է գրանցվել, սակայն շտապօգնության բրիգադը  ֆիքսել է միայն երեխայի կենսաբանական մահը:

«Մենք գնացինք և, ցավոք, արդեն ուշ էր: Այրվել էր երեխայի մարմնի 1/4 մասը, այսինքն` աջ կողմը գրեթե ամբողջությամբ` պարանոց, կրծքավանդակ, որովայն: Գոյություն ունի այրվածքային հիվանդություն, և եթե ժամանակին համապատասխան բուժօգնություն չի ցուցաբերվում այրվածք ստացած մարդուն, դրանց հետևանքով  մաշկը սկսում է մեռուկացվել և թույն արտադրել, օրգանիզմը թունավորվում է` ինտոքսիկացիայի է ենթարկվում և, ի վերջո, մահանում է»,- ասաց Սիմոնյանը:

Ի դեպ, yerkir.am-ի տեղեկություններով` ընտանիքը Վանաձոր է տեղափոխվել մեկ տարի առաջ՝ Արարատի մարզից: Աղջիկն ընտանիքի միակ երեխան չէր, նրանք ունեն երեխաներ, որոնցից մի քանիսին մանկատուն են տեղափոխել: Ընտանիքը սոցիալապես ծայրահեղ վիճակում է, ապրում է տնակում, որն անգամ դուռ չունի:

Դեպքի առթիվ Լոռու մարզի քննչական բաժնում նյութեր են նախապատրաստվում: