«Վերնիսաժ»-ի գործով նիստը սկսվեց ուշացումով` ամբաստանյալի համար շտապօգնություն էին կանչել

«Վերնիսաժ»-ի գործով Կենտրոն և Նորք-Մարաշ վարչական  շրջանների ընդհանուր իրավասության դատարանում դատական նիստը սկսվեց շուրջ մեկ ժամ ուշացումով, քանի որ ամբաստանյալ Վալերի Հովհաննիսյանը վատառողջ էր, եւ շտապօգնություն էր հրավիրվել դատարան:

Դատական նիստը բացված հայտարարելուց հետո դատավոր Գագիկ Պողոսյանը հետաքրքրվեց  ամբաստանյալի առողջական վիճակով: Նա անորոշ պատասխան տվեց:

Դատարան չէին ներկայացել գործով երեք տուժողները: Նրանցից երկուսը ծանուցում չէին ստացել դատական նիստի վերաբերյալ, իսկ մեկը, թեև պատշաճ ծանուցվել էր, սակայն դատարան չէր ներկայացել:

Դատարանի հարցմանն ի պատասխան՝ դատախազ Հ. Սարգսյանն ասաց, որ դատական նիստը պետք է  հետաձգել տուժողների` ներկա չլինելու պատճառով: Ամբաստանյալների  պաշտպանները նույնպես կողմ էին նիստը հետաձգելուն: Դատարանը որոշեց  տուժողներին կրկին ծանուցել հաջորդ դատական նիստի վերաբերյալ և դատական  հաջորդ նիստը նշանակեց դեկտեմբերի 3-ին:

Վալերի Հովհաննիսյանի պաշտպան  Արայիկ Ալվանդյանը, մինչ դատարանի որոշումը հրապարակելը, ցանկացավ միջնորդություն ներկայացնել, սակայն դատավոր Գագիկ Պողոսյանը սաստեց նրան՝ ասելով, որ խանգարում է դատարանին` որոշումը հրապարակել, և միայն որոշումը հրապարակելուց հետո փաստաբան Ալվանդյանը  հայտնեց, որ միջնորդությունը վերաբերում էր իր պաշտպանյալին երկրորդ անգամ վիրահատելուն: Դատավորը պատասխանեց, որ այդ հարցով կարող են դիմել քրեակատարողական հիմնարկի ղեկավարությանը: Նշենք, որ երեք ամբաստանյալներն էլ գտնվում են «Նուբարաշեն» ՔԿՀ-ում: