Հայաստանը բավական մեծ փորձ է կուտակել «Դպրոցական սնունդ» ծրագրի շրջանակներում. Դանիել Բալաբան

Հայտնի է, որ Հայաստանն իրականացնում է «Դպրոցական սնունդ» զարգացման ծրագիրը: Երևանի «Մարիոթ» հյուրանոցում տեղի ունեցավ Երեխաների սնուցման համաշխարհային 18-րդ ֆորումի բացման արարողությունը:

Պարենի համաշխարհային ծրագրի սովի դեմ գերազանցության կենտրոնի տնօրեն Դանիել Բալաբանը լրագրողների հետ զրույցում նշեց, որ տարբեր երկրներում կան տարբեր խնդիրներ, և իրենք դրան համարժեք մոտեցումներ են փորձում ցուցաբերել:

«Որոշ երկրներում թերսնուցման խնդիր կա, որոշ երկրներում` գերսնուցման, բայց կան շատ երկրներ էլ, որտեղ ուղղակի սնունդ չկա: Մեր խնդիրն այն է, որ բոլոր երկրներում  դպրոցական սնունդը համարժեք կերպով ապահովվի, և սնունդը պետք է ապահովել` համաձայն երկրի պահանջի, այսինքն` որտեղ թերսնուցում է սննդարար ուտելիք տրամադրել, որտեղ գերսնուցում է` առողջարար սնունդ»,- ասաց Բալաբանը:

Նա հայտնեց նաև, որ իրենք հիմա Հայաստանում են, քանի որ Հայաստանը գտնվում է շատ ճիշտ ուղու վրա, և իրենք հետազոտելու են Հայաստանի փորձը: «Հայաստանը բավական մեծ փորձ է արդեն կուտակել: Մենք խնդիր չենք տեսել Հայաստանում և արդեն հինգշաբթի օրը 45-ից ավելի երկրների ներկայացուցիչների հետ այցելություններ կունենանք Հայաստանի դպրոցներ ու կտեսնենք, թե ինչպես է տեղում կազմակերպվում գործընթացը` թե\' սննդի, թե\' սննդարարության առումով»,- ասաց Բալաբանը: