Մենք միջազգային իրավաբաններ ենք վարձել․ Հրաչյա Ռոստոմյան

ՀԱՕԿ գլխավոր քարտուղար Հրաչյա Ռոստոմյանն այսօր լրագրողների հետ զրույցում  անդրադարձավ հունահռոմեական ոճի ըմբիշ Միհրան Հարությունյանի եզրափակիչ մենամարտին, երբ մրցավարները հաղթանակն անարդարացիորեն շնորհեցին սերբ մրցակցին:

«Միհրան Հարությունյանի եզրափակիչ գոտեմարտը բոլորդ տեսաք. հաղթանակը լկտի ձևով հանձնեցին մրցակցին։  Ինչ վերաբերում է գոտեմարտի բողոքարկմանը, մենք խնդիրներ ունենք, թե ինչի համար պետք է բողոքարկենք։ Մրցավարական կանոնադրության մեջ հստակ կետեր չկան։ Մրցավար կա, որ կարող է ասել` պասիվ է եղել մարզիկը, և կարող է ասել՝ ոչ։  Մենք հիմա շատ սերտ աշխատում ենք Լոզանի մարզական դատարանի հետ, միջազգային իրավաբաններ ենք վարձել, ովքեր աշխատում են այդ ուղղությամբ։ Երբ նրանք կասեն, թե ինչ ձևով պետք է բողոքարկենք, անպայման կանցնենք գործի:  Աշխարհի առաջնությունում Միհրանի գոտեմարտից հետո հասանք նրան, որ 4 մրցավարի հեռացրեցին։ Հույս ունեինք, որ դա կնպաստի մրցավարների հետագա զգուշությանը, բայց հասկացանք, որ մրցավարներն ուղղակի կամակատարներ են»,- ասաց Ռոստոմյանը։