Երբեք չմտածե´ք, որ դուք երկրորդ կամ երրորդ կարգի քաղաքացիներ եք. նախարարը՝ հարազատ ֆակուլտետի ուսանողներին

ՀՀ էկոնոմիկայի նախարար Արծվիկ Մինասյանն այսօր՝ սեպտեմբերի 1-ին, այցելել էր ԵՊՀ  տնտեսագիտության և կառավարման ֆակուլտետ՝ մասնակցելու հարազատ ֆակուլտետի նոր ուսումնական տարվա առաջին օրվան նվիրված հանդիսավոր արարողությանը:

Մինասյանն իր ելույթում ողջունեց ֆակուլտետի պրոֆեսորադասախոսական կազմին, ուսանողներին, ապա, շարունակելով խոսքը, երկու շեշտադրում արեց. «Ձեզանից յուրաքանչյուրը մի ընտանիք զավակ է, և այդ ընտանիքում ձեզ հետ կապում են մեծ հույսեր, ապագային  միտված ծրագրերի իրականացման  երազանքներ, հետևաբար չթողնեք, որ այդ երազանքներն օդում մնան: Դրա համար էլ պետք է արդարացնել հույսն ու հավատը, վստահությունը, որ ձեր ընտանքիներում ձևավորվել է: Դուք ՀՀ քաղաքացիներ եք, և ձեզանից  յուրաքանչյուրն իր առօրյա կյանքում հանդիպելու է  բազմազան խնդիրների, բայց երբեք չընկճվեք առկա խնդիրներից, դուք պետք է ձգտեք, որպես քաղաքացիներ, ապրել և օր օրի զարգացնել  ձեր միջավայրը»:

Նախարարն ուսանողներին հորդորեց իրենց իրավունքների համար պատրաստ լինել պայքարի: «Երբեք չմտածե´ք, որ դուք երկրորդ կամ երրորդ կարգի քաղաքացիներ եք, դուք  առաջնակարգ քաղաքացիներ եք, դուք Հայաստանի Հանրապետության քաղաքացիներ եք, և ուսումնառության ընթացքում այս գիտակցումը երբեք չպետք է լռի, հակառակը`  պետք է ամրապնդի ուսում ստանալու ձգտումն ու ցանկությունը: Միայն գիտելիքով զինվածն է, որ կարող է իր իրավունքները հավուր պատշաճի առաջ տանել»,- ասաց նա՝ հավելելով, որ մեր տնտեսությունը դեռևս չի կարողանում ապահովել պատշաճ զբաղվածություն:

«Մեր տնտեսությունը դեռևս չի կարողանում լիարժեքորեն ապահովել մրցունակություն,  ամբողջական արտադրանքի իրացում: Այսօր մեր տնտեսության առջև բազմաթիվ դժվարություններ կան, մեր տնտեսությունը դեռևս չի լուծել մի քանի հիմնական հարցեր: Խնդիրների լուծման կարևոր  բանալին  պատշաճ մասնագիտական կազմ ունենալն է, որը մեր  կառավարման ու տնտեսության զարգացման հիմնարար հարցերից մեկն է: Ցանկացած տնտեսության հիմնարար զարգացման հիմքը երեք ռեսուրս է ՝ տեխնոլոգիաներ, ներդրումներ,  մարդկային և մասնագիտական կարողություններ»,- նշեց նախարարը:

Մինասյանի խոսքով՝ մեր տնտեսական ոլորտները զարգացնելու համար պետք է զարգացնել բարձր տեխնոլոգիաների ոլորտը: «Այս ոլորտում արձանագրվում է 20-25 տոկոս աճ: Շատ կարևոր է և ցույց է տրվում, որ  ՀՀ-ն ունակ է մարդկային ներուժը դարձնել իր  զարգացման  հիմնական մրցակցային առավելությունը: Կենտրոնական տեղում մարդկային կապիտալն է: Այսօր մեզ պետք է ոչ թե մեկ կամ երկու տոկոս տնտեսական աճ, հարկավոր են հիմնական փոփոխություններ»,- ասաց նախարարը: