Քնում եմ մեզոտ անկողնում. Էրդողանին «վիրավորած» լրագրողը՝ բանտում իր հանդեպ վերաբերմունքի մասին

Նախագահ Էրդողանին «վիրավորելու» մեղադրանքով մեկ շաբաթ առաջ Թուրքիայում ձերբակալված հայտնի գրող, սյունակագիր Ասլը Էրդողանը բանտում պատասխանել է լրատվամիջոցների հարցերին:

Ըստ Siyasihaber3-ի՝ նա պատմել է բանտային սարսափելի պայմանների, ինչպես նաև իր դեմ սպառնալիքների մասին: Նշելով, որ առողջական լուրջ խնդիրների առաջ է կանգնած, Էրդողանը պատմել է. «Արդեն 10 տարի է՝ աղիքային խնդիրներ ունեմ: Ենթաստամոքսային գեղձս եւ մարսողական համակարգս չեն աշխատում, և արդեն 5 օր է՝ դեղերս չեն տալիս: Հատուկ սննդակարգ պետք է ունենամ, սակայն միայն մածուն եմ ուտում: Սենյակս չի օդափոխվում, քնում եմ մեզոտ անկողնում: Ինձ հետ վարվում են այնպես, որ դրանց հետևանքով մարմնիս վրա գոյացած հետքերը մնայուն կլինեն»:

Նա հայտարարել է, որ բանտից դուրս գալուց անմիջապես հետո ձախ ձեռքի վրա դաջվածք է անելու, ինչպես Աուշվիցում կին բանտարկյալների ձեռքին բռնի կերպով  դաջվածքներ էին անում: «Դաջելու եմ 16.08.16 թիվը` այն օրը, երբ ոստիկանները ներխուժեցին իմ տուն»,- ասել է լրագրողը: 

Հիշեցնենք, որ Ասլը Էրդողանը ձերբակալվել է օգոստոսի 18-ին՝ «Ազատ օրակարգ» (Özgür Gündem) թերթի փակումից 2 օր անց: Լրագրողի փաստաբանը հայտարարել էր, որ լրագրողն ունի առողջական լուրջ խնդիրներ, և բանտային պայմանները կարող են մահացու լինել նրա համար: