Եթե կա մեղավոր, ապա դա ես եմ. Հակոբ Սերոբյան

Մարմնամարզության Հայաստանի հավաքականի գլխավոր մարզիչ Հակոբ Սերոբյանը, ինչպես նաև մարմնամարզիկներ Հարություն Մերդինյանն ու Արթուր Դավթյանն  այսօր լրագրողների հետ զրույցում խոսեցին Ռիոյում կայացած օլիմպիական խաղերում իրենց ելույթների մասին:

«Մենք  լավ էինք պատրաստվել: Նույն ժամային գոտում հավաք էինք անցկացրել:  Ես եղել եմ մրցավար և տղաներին տեսել եմ միայն գլխավոր մարզման ժամանակ, իսկ մարզումներն անցկացվում էին մարզիչ Սոս Սարգսյանի գլխավորությամբ: Ես տեսնում էի միայն տեսագրությունները:  Մերդինյանն առաջին օրը լավ ելույթ ունեցավ: Դաստակի հետ կապված խնդիր ուներ, ինչի պատճառով բարդ վարժություն չկատարեց: Նա ավելի լավ կասի, թե ինչն իրեն խանգարեց ավելի բարձր տեղ գրավելու համար: Դավթյան Արթուրն առաջին ցատկը լավ կատարեց: Երկրորդ ցատկի ժամանակ ընկավ և 11-րդ տեղը գրավեց»,- ասաց Սերոբյանը:

Մարզիչը նշեց, որ մեդալ չնվաճելու համար ինքն արդարացումներ չի փնտրում: «Ինչ-որ մի բան սխալ արեցինք: Ուրեմն պետք է գտնենք, թե ինչն ենք սխալ արել և ինչն ենք բաց թողել: Մենք չենք արդարանում և չենք էլ ման գալիս արդարանալու պատճառներ: Ես լարվածությունից գիշերները չեմ քնել: Մենք չէինք գնացել` ուղղակի մասնակցելու համար: Հույս ունեինք գոնե բրոնզե մեդալի: Եթե ինչ-որ մեկն ունի մեղավորություն, ապա դա ես եմ, քանի որ գլխավոր մարզիչն եմ»,- ասաց Սերոբյանը:

Մարմնամարզիկ Հարություն Մերդինյանը նշեց, որ իրեն խանգարեցին ոչ այնքան դաստակի ցավերը, որքան հոգնածությունը: «Լարվածությունն ու դաստակի ցավերն այդքան չէին խանգարում: Դա միշտ լինում է: Մարզումնեևրի ժանանակ ցավեր միշտ ունենում եմ: Հոգեբանորեն պատրաստ էի: Պարզապես ուժերս էին սպառվել, հոգնածություն կար, այդ պատճառով դժվարացա եզրափակիչի օրը հավաքվել և վարժությունս կատարել: Գնահատականներս բարձր էին: Ես առաջնային մտածում էի` կատարեմ վարժությունս: Պարզապես ամբողջ մարմինս չէի կարողանում կառավարել: Միայն մտածում էի` մինչև վերջ կարողանալ վարժությունս կատարել»,- ասաց մարզիկը:  

Մարմնամարզիկներից մյուսը՝ Արթուր Դավթյանը, նշեց, որ իրեն խանգարեց սպորտային բախտը: «Բոլորս էլ գիտեինք, որ գոնե եզրափակիչի հնարավարություն ունենք: Իմ պարագայում պարզապես սպորտային անհաջողությունն էր պատճառը: Վնասվածքներ չունեի: Երկրորդ ցատկի ժամանակ հատակը չզգացի»,- ասաց նա: