Շատ գոհ եմ մեր մարզիկների ելույթներից. Հակոբ Սերոբյան

 Մարմնամարզության Հայաստանի հավաքականի գլխավոր մարզիչ Հակոբ Սերոբյանն այսօր՝ լրագրողների հետ հանդիպման ժամանակ,  ամփոփեց հայ մարմնամարզիկների ելույթներն աշխարհի առաջնությունում:

«Շատ վատ տրամադրությամբ մեկնեցինք Գլազգո, քանի որ Արթուրը գլխապտույտ ուներ և  չէր մարզվել մեկ շաբաթ: Ընդհանուր առմամբ, մրցումները սպասվածից լավ ընթացան մեզ համար: Արթուր Դավթյանը շատ արագ վերականգնվեց, արդարացրեց մեր սպասելիքները: Մերդինյան Հարությունը կատարեց այն, ինչ կարողանում էր:  Հավանաբար, դրանից ոգևորվելով, Վահագն Դավթյանը ևս լավ ելույթ ունեցավ:  Վահագնը վերջում փոքր սխալ թույլ տվեց և զրկվեց մեկ միավորից: Եթե ռեալ նայենք,՝ Վահագնի համար մեծ դժվարություն էր մեդալ նվաճելը: Շատ գոհ եմ մեր մարզիկների արդյունքից: Մարմնամարզություն մարզաձևում միայն աշխարհի առաջնությունն է հնարավորություն տալիս ձեռք բերել օլիմպիական վարկանիշ, այդ պատճառով մրցակցությունը շատ մեծ է: Ռեկորդային թվով երկրներ էին մասնակցում այս տարի: Եղել են 81 կամ 82 երկիր, բայց այս անգամ 87 երկիր էր մասնակցում»,- ասաց մարզիչը:   

Խոսելով մարմնամարզուհի Հուռի Գեբեշյանի ելույթի մասին, Սերոբյանն ասաց. «99 տոկոսով Հուռի Գեբեշյանը կնվաճի օլիմպիական ուղեգիր: Աշխարհի առաջնությունում հենց առաջին փորձից զարմանալիորեն  ընկավ գերանից: Բայց դրանից հետո շատ լավ կատարեց վարժությունները և 11-րդ տեղը գրավեց: Test Event-ում աղջիկներից միայն մեկն է դուրս մնալու: Այդ պատճառով մեր շանսերը շատ մեծ են»-ասաց Հայաստանի հավաքականի գլխավոր մարզիչ Հակոբ Սերոբյանը:

Հիշեցնենք, որ Հայաստանի ներկայացուցիչ Հարություն Մերդինյանը (նժույգթափեր) աշխարհի առաջնությունում դարձել էր բրոնզե մեդալակիր: Անհատական մրցաձևերում Հարություն Մեդինյանը հավաքել է 15. 500 միավոր և դարձել աշխարհի առաջնության երրորդ մրցանակակիր, ինչպես նաև նվաճեց Օլիմպիական խաղերի ուղեգիր: Իսկ Արթուր Դավթյանն ու մարմնամարզուհի Հուռի Գեբեշյանը իրավունք է ստացել մասնակցելու Ռիոյում կայանալիք «Թեստ իվենթ»-ին, որտեղ աշխարհի առաջնությունում գրանցած արդյունքը կրկնելու դեպքում կնվաճեն օլիմպիական ուղեգիր: