Եթե քո երկրում 20 հազար ապրանքատեսակ ներկրում է 7 օլիգարխ, ապա ԵԱՏՄ-ն այդտեղ մեղավոր չէ. Նաիրա Զոհրաբյան

Դուռը շրխկացնելով փակելն ամենահեշտ ճանապարհն է. «Ելք» խմբակցության կողմից նախաձեռնված` ԵԱՏՄ-ից  Հայաստանի դուրս գալու մասին ԱԺ լսումների ժամանակ կարծիք հայտնեց «Ծառուկյան» խմբակցության պատգամավոր Նաիրա Զոհրաբյանը: Նա հարցեց` ինչո՞ւ չենք կարողանում օգտվել ԵԱՏՄ-ի հնարավորություններից. երբ ԵՄ-ն էմբարգո է կիրառում Ռուսաստանի նկատմամբ, մենք ունենք ռացիոնալ կերպով մեր գյուղատնտեսությունը զարգացնելու հեռանկար:

«Բայց երբ մեր երկրում ծիրանի արտահանումը քվոտավորված է, մի քանի մարդիկ իրավունք ունեն արտահանելու միայն, հիմա այստեղ այդ ինտեգրացիոն գործընթա՞ցն է մեղավոր, թե՞ իշխանությունը: Երբ Հայաստանը, շատերի գնահատմամբ, դարձել է «Գազպրոմ»-ի դուստր ձեռնարկությունը, ո՞վ է մեղավոր. նախորդ խորհրդարանում, այս խորհրդարանում ստորագրվեց պայմանագիր, որ որևէ այլ երկրի հետ 40 տարի իրավունք չունենք գազային պայմանագիր կնքել, ԵԱՏՄ-ն՞ է մեղավոր»,- նետեց պատգամավորը:

Զոհրաբյանի կարծիքով` ինտեգրացիոն ցանկացած բլոկից կարելի է օգուտ քաղել` ի շահ սեփական երկրի, եթե ունես ադեկվատ իշխանություն: «Եթե ԵԱՏՄ մնացած երկրները կարողանում են ԵԱՏՄ-ի խաղի կանոնները հարմարեցնել իրենց երկրի շահերին, մենք չենք կարողանում, հիմա պետք է բողոքենք Նազարբաևից ու Լոււկաշենկոյի՞ց, իհարկե` ոչ»,- ասաց պատգամավորը, ապա նշեց, որ խնդրին այլ տեսակետից պետք է նայել:

Նա ընդգծեց, որ դուրս գալը մի քվեարկության խնդիր է:

Ըստ Զոհրաբյանի` 600 հազար աշխատանքային միգրանտներ ունենք ՌԴ-ում, և այլ հարց է, թե ինչու այդ մարդիկ իրենց երկրում աշխատանք չունեն ու այնտեղ են: Ապա նշեց, որ ունենք մի քանի միլիոն բնակիչ, ովքեր ամեն ամիս 150 մլն դոլարի տրանսֆերտ են ուղարկում իրենց ընտանիքներին: Պատգամավորը կարծիք հայտնեց, որ եթե այդ գումարները չլինեին Հայաստանում, աղքատությունը չէր լինի 30 %, այլ կլիներ 98%:

Զոհրաբյանը կարծում է, որ այս ամենի ակունքներն այստեղ պետք է փնտրել: «Փորձել եմ թղթի վրա դնել պլյուս և մինուս նշանները: Այո, սխալ վարած քաղաքականության արդյունքում դառնում ես ոչ թե իրական բաժնետեր, այլ դառնում ես մասովկա, այստեղ է, որ մենք պետք է հասկանանք` ինչպես պետք է ճիշտ գնալ այս ուղիով, խաղի կանոններն ինչպիսին պետք է լինեին, որ մենք չհայտնվեինք այս վիճակում»,- ասաց նա:

Պատգամավորը ևս մեկ անգամ շեշտեց, որ դուռը շրխկացնելով փակելը սխալ է, և որ խնդիրները մեզ մոտ են: «Եթե քո երկրում 20 հազար ապրանքատեսակ ներկրում է 7 օլիգարխ, և տնտեսության թոքերը փակված են, տնտեսությունը ամբողջությամբ խեղդված է մոնոպոլիայի սարդոստայնում, ապա բոլոր պրոբլեմները մենք պետք է փնտրենք մեր երկրում: Միշտ էլ կարելի է առավելագույն ճիշտ քաղաքականության դեպքում ունենալ առավելագույն արդյունք, եթե քո իշխանությունն առաջնորդվում է քո պետության շահերով, ոչ թե ինչ-որ նեղ թիմի` նեղ անձնական շահերով»,- եզրափակեց Զոհրաբյանը: