Թուրքերը հանրային զուգարանի կվերածեն տունը, ուր ծնվել է Գյուլենը

Թուրքական Beyaz TV-ի հաղորդավար Լաթիֆ Շիմշեքը հայտնել է, որ Կարինի (Էրզրում) Քորուջուք գյուղում գտնվող տունը, ուր ծնվել է Ֆեթուլլահ Գյուլենը, կվերածվի հանրային զուգարանի:

Ըստ T24-ի՝ այդ մասին Շիմշեքը հայտնել է Twitter-յան իր էջում:

Հայտարարությունից հետո Beyaz TV-ին պարզաբանումներ ներկայացրած հաղորդավարն ասել է.

«Էրզրումցի ընկերներիցս մեկը զանգահարեց և ասաց, որ Էրզրումի քաղաքապետարանը պատրաստվում է հանրային զուգարանի վերածել այն տունը, ուր ծնվել է Ֆեթուլլահ Գյուլենը: Սկզբում ինձ թվաց՝ կատակում է: Զանգահարեցի Էրզրումի քաղաքապետ Մեհմեդ Սեքմանին. նա նշեց, որ հանրության կողմից այդ ուղղությամբ մեծ պահանջ կա, ինչը քննարկելու են: Քաղաքապետը միաժամանակ նշեց, որ, ամենայն հավանականությամբ, ժողովուրդը դրան դեմ չի լինի»:

Նշենք, որ Գյուլենը մեղադրվում է Թուրքիայում ռազմական հեղաշրջման փորձն իրականացնելու մեջ: