Գնումների ոլորտում խիստ վերահսկողություն սահմանել` ներքին աուդիտի կիրառմամբ. Հովիկ Աբրահամյան

Այսօր կառավարության նիստում վարչապետ Հովիկ Աբրահամյանը բարձրաձայնեց գնումների ոլորտի հետ կապված գործընթացների մասին: Նրա խոսքով` գնումների գործընթացում հնարավոր կոռուպցիոն ռիսկերի նվազեցման նպատակով մասիսի 26-ին ֆինանսների նախարարությանը հանձնարարվել էր գնումների գործընթացի տարբեր փուլերում բարելավել թափանցիկությունը` հնարավորություն ընձեռելով յուրաքանչյուր անձի էլեկտրոնային գնումների կայքէջում տեսնել գնումների գործընթացում կնքած բոլոր պայմանագրերը և ինքնուրույն կազմել հաշվետվություն:

ՀՀ ֆինանսների նախարարության կողմից մշակվել է գնումների հաշվետվողականության համապատասխան մոդուլ, որը հասանելի է հանրությանը: Պետք է ապահովել գնումների գործընթացի մասնակիցների ակտիվ մասնակցությունը:

«Հանձնարարում եմ պետական իշխանության մարմիններին, հորդորում եմ գնումների մասնակիցներին` ակտիվորեն օգտվել հաշվետվողականության նոր գործիքից և դրա բարելավման վերաբերյալ առաջարկներ ներկայացնել ֆինանսների նախարարությանը: Բացի այդ` կարևոր է բարձրաձայնել գնումների ոլորտում առկա խնդիրների մասին: Հանձնարարում եմ պետական իշխանության պատկան մարմիններին` խստագույն վերահսկողություն իրականացնել գնումների ոլորտում ներքին աուդիտի պահպանմանը, դրանց արդյունքների թափանցիկությանը»,- ասաց վարչապետը: