Կառավարությունը 168,3 մլն դրամի դեղ կգնի

Կառավարության վաղվա նիստի օրակարգում առողջապահության նախարարությունը ներառել է որոշում, ըստ որի կառավարությունը որոշում է թույլատրել առողջապահության նախարարությանը իրականացնել 2016 թվականի կարիքների համար անհրաժեշտ դեղերի գնման ընթացակարգը:

ՀՀ առողջապահության նախարարության կողմից բնակչության դեղապահովումը իրականացվում է` համաձայն ՀՀ կառավարության` 23 նոյեմբերի 2006 թվականի «Անվճար կամ արտոնյալ պայմաններով դեղեր ձեռք բերելու իրավունք ունեցող բնակչության սոցիալական խմբերի և հիվանդությունների ցանկերը հաստատելու մասին»  որոշմամբ:

 Առաջարկվող Նախագիծը նպատակ ունի դեղապահովման գործընթացը կազմակերպել առանց դրա համար սահմանված ժամկետային սահմափակումների: Հաստատված գնումների անվանացանկում ներառված դեղերը պլանավորվել են, սակայն ձեռք չեն բերվել հաշվի առնելով  մի  շարք հանգամանքներ, մասնավորապես` ՀՀ ԱՆ «Մարդասիրական օգնության հանրապետական կենտրոն» ՊՈԱԿ-ում, ՀՀ մարզերի և քաղաք Երևանի բժշկական հաստատություններում  առկա  դեղերի մնացորդները,  2015 թվականի դեղերի միջին տարեկան փաստացի ծախսերը և հաշվառված հիվանդների թիվը: Նախատեսվում էր նաև անհրաժեշտ դեղերը ստանալ մարդասիրական օգնության ճանապարհով, սակայն չեն ստացվել:

Ամփոփելով ՀՀ մարզերի և քաղաք Երևանի բժշկական հաստատությունների կողմից ներկայացված` 2016 թվականի առաջին եռամսյակի հաշվետվությունները` արձանագրվել է համապատասխան հիվանդների թվի աճ և դեղերի միջին ամսական ծախսերի ավելացում: Վերը նշված հանգամանքները հանգեցրել են նրան, որ առկա մնացորդները չեն բավականացնի հիվանդների դեղապահովման գործընթացը պատշաճ իրականացնելու համար:

Խնդրի կարգավորման նպատակն է բավարարել ներկայումս առաջացած անհետաձգելի  պահանջը` ձեռք բերելով 2016 թվականի գնումների անվանացանկով հաստատված դեղեր` 168,3 մլն  դրամ գումարի չափով դեղեր:

Իրավական ակտի ընդունման արդյունքում ակնկալվում է  համապատասխան հիվանդների  դեղապահովման գործընթացի անխափան և պատշաճ մակարդակով կազմակերպում:  Միաժամանակ,  կբացառվեն ՀՀ բժշկական հաստատություններում դեղերի հավելյալ քանակների կուտակումները, և կապահովվի պետական բյուջեով հատկացված միջոցների արդյունավետ և նպատակային իրականացումը: