ՀԱՊԿ ԱԳ նախարարների խորհուրդը ԼՂ հարցով համատեղ հայտարարություն է ընդունել. Բորդյուժա

Այսօր համատեղ մամուլի ասուլիսով հանդես եկան ՀՀ ԱԳ նախարար Էդվարդ Նալբանդյանը և ՀԱՊԿ գլխավոր քարտուղար Նիկոլայ Բորդյուժան:

Նախ` Էդվարդ Նալբանդյանը նշեց, որ այսօր Երևանում  տեղի է ունեցել ՀԱՊԿ արտգործնախարարների խորհրդի նիստը` իր նախագահությամբ, որի ընթացքում քննարկվել է նախագահների մակարդակով ձեռք բերված պայմանավորվածությունների` ՀԱՊԿ խորհրդի շրջանակներում  իրականացման ընթացքը, ինչպես նաև հայաստանյան նախագահության առաջնահերթությունների իրականացումը:

«Հայաստանը մշտապես ակտիվ և նախաձեռնող է եղել ՀԱՊԿ շրջանակներում, ՀԱՊԿ դերակատարության ակտիվացման , անդամ երկրների միջև համագործակցության սերտացման առումով»,- ասաց Նալբանդյանը:

ՀԱՊԿ գլխավոր քարտուղար Նիկոլ Բորդյուժան իր խոսքը սկսեց Իրաքում երեկ տեղի տեղի ունեցած խոշոր ահաբեկչությունից, ցավակցելով զոհերի հարազատներին: Նա նշեց, որ ՀԱՊԿ նախարարների խորհրդի նիստում անդրադարձ է կատարվել ահաբեկչության դեմ արդյունավետ պայքարելու գործիքների մշակմանը:

«Մեզ համար այսօր ահաբեկչության դեմ պայքարի հարցը առաջնային է, դրա հետ կապված` ՀԱՊԿ շրջանակներում մշակվել է գործողությունների պլան, որոնք պետք է իրականացնենք ահաբեկչության դեմ պայքարում»,- ասաց Բորդյուժան:

Նրա խոսքով` լուրջ անդրադարձ է եղել միջազգային անվտանգության հարցերին, որի թվում է ԼՂ հակամարտության հարցը, որի վերաբերյալ համապատասխան հայտարարություն է ընդունվել ՀԱՊԿ ԱԳ նախարարների խորհրդի նիստում: