Գուցե ստրատեգիա է. Վանաձորի քաղաքապետի թեկնածուն` իր առաջադրման մասին

Վանաձորի քաղաքապետի ընտրություններում Հանրապետական կուսակցության թեկնածուն ՀՀ նոտարական պալատի նախկին նախագահ, Վանաձորում նոտարի լիազորություններ իրականացնող Մամիկոն Ասլանյանն է: 

Նա Yerkir.am-ի հետ զրույցում ասաց, որ իր առաջադրման որոշումը «կուսակցական է»: «Մարզպետն էլ է ասել այդ մասին, ու սա կուսակցության որոշումն է եղել. տարբեր չափորոշիչներով նայել են, ինձ են հարմար գտել: Ես որևէ բան չեմ կարող ասել, մեկնաբանել, որովհետև որոշումը կոլեգիալ է, կուսակցական: Համ էլ` այստեղ գուցե ինչ-որ տակտիկա կամ էլ ստրատեգիա կա, որն իմ մեկնաբանելու հարցը չէ»,- ասաց Ասլանյանը:

Նա թեև համաձայնեց, որ Վանաձորում ակնհայտ խնդիրներ կան, բայց, միևնույն ժամանակ, կարծիք հայտնեց, որ այդ խնդիրները գուցե օբյեկտիվ պատճառներով լուծումներ չեն ստացել:

«Խնդիրների լուծման կարելի է գնալ իրադրությանը սառը, հաշվենկատ նայելու  ու այդ խնդիրներին հատված-հատված լուծումներ  տալու պարագայում: Եթե խնդիրներին լուծումներ չտրվեն, քանի գնա, խորանալու են: Դրա համար պետք է ճիշտ տակտիկա մշակվի և հասկանալի դառնա` ամեն խնդրին ինչ տիպի լուծում պետք է տրվի`հատվածայի՞ն, թե՞  տարածական: Ես հակված եմ նրան, որ որևէ ոլորտ, որևէ հատված  դուրս չմնա, ու հնարավոր լինի խնդիրները լուծել, կամաց-կամաց առաջ գնալ` մինչև կարողանանք ֆինանսական միջոցներ ներգրավել` կա'մ դրսից, կա'մ կառավարությունից, որովհետև միայն քաղաքի բյուջեով շատ մեծ թափի խնդիրներ հնարավոր չէ լուծել»,- ասաց քաղաքապետի թեկնածուն` հավելելով, որ այս պահին չի կարող ասել, թե հատկապես ո՞ր խնդիրն է ամենից շատ ծառացած բնակչության առջև:

«Ես իմ բնավորությամբ ավելի շատ անալիտիկ եմ: Պետք է նայեմ, վերլուծեմ, թիմով  վերլուծենք, տեսնենք` ինչ իրավիճակ է, և հասկանանք` ի՞նչ կարելի է անել, այլ ոչ թե ինչ-որ էմոցիաների վրա շեշտը դնել ու այդ հարթության վրա լուծումներ առաջադրել:  Պետք է լուրջ խումբ հավաքվի, ընդհանուր որոշվի, թե  կոնկերտ  ի՞նչ ուղղությամբ ենք գնալու, ի՞նչ գործեր  կան անելու, այլ ոչ թե հանպատրաստից ասել` էս կանեմ, էն կանեմ: Դա իմ  ոճը չէ»,- ասաց Ասլանյանը:

Հարցին`ընտրվելու պարագայում ի՞նչ «ժառանգություն» է Ձեզ սպասում, պատասխանեց. «Որ ընտրվեմ, իմ առաջին նշանաբաններից մեկը հետ չնայելն է,  ես ուզում եմ առաջ նայել: Ինչ ժառանգություն ստացել եմ, ակնառու է, երևում է: Ինչը որ արտաքինից  երևում է,  երևում է փաստացի, իսկ մնացածը, մինչև չընտրվեմ, չեմ կարող ասել`ինչ ժառանգություն եմ ստացել: Ուզում եմ ասել` ինչը լուծելի է, լուծելի է, ինչն էլ` չէ, ասեմ` հնարավոր է նաև, որ օբյեկտիվորեն լուծելի չէ: Օբյեկտիվ ու սուբյեկտիվ խնդիրներ կարող են լինել, հետևաբար, այս պահին ես գնահատական չեմ կարող տալ»:

Պատասխանելով  հարցին` ինչո՞ւ  պետք է ժողովուրդը Ձեզ ընտրի, Ասլանյանը նշեց. «Ժողովուրդը պետք է հավատալիս էլ, չհավատալիս էլ մոտիվացիա ունենա: Ես այս քաղաքում եմ մեծացել, այս քաղաքում եմ ապրել, այս քաղաքի ամեն ինչն ինձ համար հարազատ է: Մթնոլորտն  ինձ ամբողջությամբ ծանոթ է, ես էլ այդ  քաղաքի մի փոքր մասն եմ ու չունեմ արած այնպիսի մի բան, որ մտածեմ`վա~յ, էս ինչ բանն արած չլինեի, կամ եթե հույս չներշնչեի կամ խաբած լինեի և այլն»: