Ոգևորված էի ու այդ պահը չեմ հասկացել. Թովմաս Պողոսյանի դպրոցի սաներն են եղել Օֆելյա Համբարձումյանի թաղմանը

Երեկ Օֆելյա Համբարձումյանի թաղման արարողությանը մասնակցել էին նաև մի խումբ երեխաներ: Երեխաների հագուստներին ամրացրված էին Ցեղասպանության անմոռուկներ հիշեցնող ժապավեններ, և նրանց կանգնեցրել էին դագաղի առջև: Երեխաները վախեցած տեսք ունեին, և սոցիալական կայքերում երեխաների` թաղման արարողությանը մասնակցելը շատերի զայրույթն էր առաջացրել:

Yerkir.am-ին մշակույթի նախարարության հասարակայնության հետ կապերի բաժնի պետ Ալլա Սերոբյանը տեղեկացրեց, որ նախարարությունը տեղյակ չի եղել այդ մասին, և իրենք չեն կազմակերպել երեխաների այցն այնտեղ: «Ավելին` մենք իմացանք, որ երեխաները պետք է նաև մի փոքր երգ կատարեն, և միջամտեցինք, որ չլինի նման բան»,- ասաց նա:

Yerkir.am-ի հետ զրույցում Ջիվանու անվան աշուղական դպրոցի տնօրեն Թովմաս Պողոսյանը նշեց, որ երեխաներն իրենց դպրոցի սաներն են: «Ծնողների, դասատուների նախաձեռնությունն է եղել, քանի որ Օֆելյա Համբարձումյանը շատ-շատ էր սիրում դպրոցը: Ինքնաբուխ նախաձեռնություն եղավ` գնալ ու խոնարհվել մեր վարպետաց վարպետի հիշատակին: Երեխաների ծնողները նույնպես ներկա են եղել արարողությանը, իսկ մինչ այդ մենք սրճարանում նստած էինք բոլորս, և ես ասել էի կանխավ, թե ով չի ցանկանում, թող չմասնակցի: Անկեղծ ու ինքնաբուխ մի բան է եղել, ես ուղղակի չեմ մտածել հեռուն»,- ասաց նա:

Դիտարկմանը, թե երեխաները կարծես վախեցած էին, Պողոսյանը պատասխանեց, թե չի հակառակվում, և եթե իմանար, առաջին հերթին ինքը դեմ կլիներ: «Ուղղակի չեմ մտածել: Ուզում էինք լավ բան անել, բայց հակառակը ստացվեց: Ուզում էինք մի քառատող էլ երգել, բայց եկան ու ասացին, որ պետք չէ, քանի որ նախատեսված չէ նման բան: Մեկը եթե հուշեր, ես սիրով կընդունեի. ոգևորված էի ու այդ պահը չեմ հասկացել»,- ասաց նա: 

Լուսանկարը` news.am_ի